Komandu F-FDTL liuhosi Komponente Apoia Serbisu (CAS) Metinaro, harii tenda militár 10 iha área Tasi-Tolu, hodi fó asisténsia ba vítima dezastre naturál. Imajen/F-FDTL.

DILI, 08 abríl 2021 (TATOLI)-Komandu FALINTIL-Forsa Defeza Timor-Leste (F-FDTL) liuhosi Komponente Apoia Servisu (CAS) Metinaro, Dili, kinta ne’e, harii tenda militár 10 iha área Tasi-Tolu, Dili, hodi fó asisténsia ba vítima dezastre naturál sira.

Xefe Estadu Maiór Jenerál F-FDTL, Tenente Jenerál Lere Anan Timor, husu ba Komandante CAS, Tenente Koronél Armindo Nunes ho ekipa bele hahú halo servisu ajuda vítima sira iha área oin-oin, inklui te’in hahán fornese ba vítima sira no halo tratamentu saúde gratuita.

Notísia Relevante : F-FDTL ho AFAMA apoiu nesesidade báziku ba refujiadu sira

Tenente Jenerál Lere Anan Timur hateten, prezensa forsa iha terrenu importante hodi tulun povu sira bele ultrapasa sasadik dezafiu sira  ne’ebé povu enfrenta iha situasaun krusiál ne’e.

“Fó korajen nafatin ba abitante sira atu reza ba Maromak ho situasaun difisil ne’ebé lori terus boot,” Tenente Jenerál Lere Anan Timor nia mensajen liuhosi komunikadu imprensa ne’ebé Agência Tatoli asesu hosi Komandu F-FDTL.

Tenda militár ne’ebé harii hodi fasilita mós vítima dezastre sira bele ba hela provizóriu hodi hein ekipa forsa konjunta ajuda hamoos fo’er no tahu-nurak iha fatin hirak ne’ebé afetadu.

Antes ne’e, Tenente Jenerál Lere hamutuk ho Asosiasaun Familia Militár Asuwa’in (AFAMA) halo mós distribuisaun nesesidade báziku ba komunidade ne’ebé maka afetadu ba dezastre naturál iha fatin refujiadu sira.

Komandu F-FDTL no AFAMA oferese ba apoia umanitária ba vítima dezastre naturál  hamutuk 1.440 iha fatin evakuasaun Dom Bosco, Comoro, João Paulo II, CVTL, INFORDEPE, SMA 4 Setembru Balidi, Ministériu Finansas, Becora, Bidau, Gembel, Balide, Hera no fatin seluk tan.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here