Ekipa Task Force hosi Diresaun Jerál Água no Saneamentu (DGAS) liuhosi Diresaun Nasionál Servisu Água (DNSA) hadi’a hikas ona liña transmisaun kanu bee-moos nian iha Benamauk, iha loron 02 agostu 2019. Nune’e, komunidade iha área Becora nian bele asesu hikas ona bee-moos hosi estasaun tratamentu Bee-moos Benamauk. Imajen/DNSA

DILI, 07 abril 2021 (TATOLI)—Diretor Opercão e Manutensão Agua e Saneamento Bee Timor-Leste (BTL.E.P), João de Piedade, informa daudaun ne’e abitante sira iha Munisípiu Dili liuliu iha bairru balun seidauk bele asesu bee-moos tanba dezastre naturál ne’ebé akontese halo sistema gravitasaun ne’ebé liga hosi bee-matan no bomba balun ne’ebé atu bomba bee iha rai okos ne’e estraga totál.

“Hanesan ita hatene kona-ba bee-moos iha Dili ne’e uza sistema rua mak hanesan sistema gravitasaun ne’e sistema ne’ebé uza hosi bee matan rai leten ne’ebé fornese bee-moos no sistema bomba ne’e uza bee rai okos ka agua subteranu bee-moos nian ne’ebé fornese bee ne’e. Maibé, inundaaun ne’ebé akontese foin lalais ne’e estraga totál sistema gravitasaun no bomba bee-moos nian balun ne’ebé liga ba bairru sira,” João de Piedade infroma ba Agência TATOLI, liuhosi telefónika, tersa ne’e.

João de Piedade hatutan, bee-moos agora laiha tanba bee ulun ka mota upstream sa’e tiha ba Casnafar entaun gravitasaun lahetan ona tanba bomba bee nian estraga totál, no sistema gravitasaun mak hanesan uza bee hosi bee-matan Mota Benamauk, Maloa, Lahane, Becuse, Dare, no Lakoto.

“Sistema bomba balun mós estraga hanesan sistema bomba iha Masaur, Kuluhun B, Terminál Becora nian, ninia trasmisaun sira estraga totál hotu. Entaun, provizóriumente ita la fornese bee-moos ba área sira-ne’ebé afeta ne’e,” nia dehan.

Nia afirma, iha Dili, fornesementu bee-moos ba komunidade ne’e bolu zona I-X (ida-sanulu), entaun daudaun ne’e komunidade ne’ebé seidauk bele asesu ba bee-moos mak hanesan hahú hosi zona IV, VII, VII no X no komunidade ne’ebé bele asesu ba bee-moos mak hosi zona I, II, III, V, no VI.

“Zona sira ne’ebé seidauk bele asesu ba bee-moos mak hanesan, hosi Zona IV Dili Sentrál tanba fornesementu bee barak liu mai hosi mota Maloa sentral totálmete bee la la’o, Zona VII mak iha área Becora Sabraka laran, Zona VIII mak Camea, Zona IX Benamauk no Terminál Becora, no Zona X iha área Cristo-Rei Toko Baru Bairru Masau, no Metiaut ne’e bee laiha tanba bomba bee nian estraga totál,” nia hateten.

Nia informa, ba zona ne’ebé bele asesu ba bee-moos mak hanesan Zona I área Comoro bele asesu bee-moos tanba bomba iha ne’ebá funsiona hotu, Zona II, Delta I, II to’o ba área Timor Plaza, Bebonuk, Fatuhada, no Kampu alór ne’e bee-moos la’o, Zona III iha área Asgor Manleuana, Delta III balu sei bele asesu ba bee-moos.

Nune’e mós, nia dehan, Zona V iha área Becora, Becuse, STM, Merkadu Becora, Ponte Maufelu, Bidau, Kuluhun B, nian hetan bee-moos tanba bomba bee di’ak hela, no Zona VI iha área Becora Au-Hun Merkadu Antigu Becora nian ne’e mós bee-moos la’o di’ak.

Tanba ne’e, nia dehan, ba fatin sira-ne’ebé agora seidauk bele asesu ba bee-moos ne’e tanba sira-nia ekipa sei halo survei no hadi’a tiha mak foin bee-moos bele la’o normál fila-fali hanesan baibain.

“Iha situasan hanesan ne’e, ami fahe ekipa haat atu haree preokupasaun ba bee-moos. Entaun, ohin, ekipa balun sai fornese tanke bee-moos ba komunidade ne’ebé presiza tebes, ekipa balun mak uza rekursu task force iha kurtu prazu de’it, tanba ami labele hadi’a hotu agora. Ba longu prazu nian, oinsá buka orsamentu para hadia bomba bee nian ne’ebé estraga hosi inundasaun ne’e,” nia informa.

Nia esplika, polítika ne’ebé mak daudaun ne’e sira aplika mak sei foku uluk ba refujiadu sira-ne’ebé hela iha sentru evakuasaun sira hanesan Sentru Formasaun Don Bosco Comoro, Edifísiu Ministériu Finansa, Cruz Vermelha Timor-Leste, Protesaun Sivíl Caicoli no sentru evakuasaun seluk tan.

“Ita sei fornese bee-moos ba sira tanba ita-nia tekniku sira agora iha hela terrenu, no oinsá ita fornese bee-moos ho urjentemente, nune’e refujiadu sira bele asesu bee-moos,” nia dehan.

Maibé, nia dehan, aleinde haree ba refujiadu sira, Dirasaun Operasaun Manutensaun Agua no Saneamentu nian sei haree mós ba komunidade ne’ebé agora seidauk bele asesu ba bee-moos, sira sei fornese bee-moos.

“Ami sei fornese tanke bee-moos ba ita-nia komunidade ne’ebé presiza liu. Identifasaun mós agora la’o hela, tanba ne’e depois apoiu emerjénsia ba refujiadu sira mak uluk hafoin ita apoiu fali tanke bee-moos ba komunidade ne’ebé presiza liu,” nia subliña.

Tanba, nia informa, sira agora iha bee tanke lima mak funsiona hela maibé dala ruma rekursu ne’e la to’o tanba uza halai ba mai, maibé ida-ne’e identifika ba segundu lugár. Tanba, daudaun ne’e, sira sei halo survei totál ba levantamentu no sira-nia tekniku hahú horsehik kedas ba halo ona survei. 

“Ohin sira ba halo survei iha mota Benamauk nian, hotu tiha mak sira la’o kobre bee-matan maibé kona-ba bee moos nian seidauk bele tanba korente bee nian sei forsa. Entaun, ami dehan depois mak levantamentu tekniku to’o iha bee ulun sira ne’ebá,” Diretór Água no Sanementu ne’e dehan.

Nia hateten, tanba área kobrementu bee-moos nian ne’e luan entaun ida ne’e mak planu privizóru ne’ebé sira hanoin, maibé dezastre naturál ne’ebé akontese ultrapasa sira-nia forsa tanba daudaun ne’e sasán estraga totál.

“Ne’ebé, fó tempu ba ami-nia tekniku la’o depois atu hadi’a. Ne’e alternativu rekursu saida mak ita bele lori iha tempu badak, médiu no longu prazu nian,” nia hateten.

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here