Espoza Prezidente Repúblika, Cidália Nobre Lopes Guterres, vizita vítima dezastre naturál ne’ebé hela iha sentru evakuasaun FMA Balide, Dili. Imajen Tatoli/Arminda Fonseca.

DILI, 06 abril 2021 (TATOLI)—Gabinete de Apoia á Actividade do Cónjuge do Presidente do Republica (GAAC-PR), ohin, hamutuk ho Rede Feto, Plan Internasionál no Komisaun Sadia fó apoiu sasán nesesidade bázika ba vítima dezastre naturál ne’ebé refujia iha sentru evakuasaun iha Komunidade Filhas de Maria Auxiliadora (FMA), Balide, Dili.

Espoza Prezidente Repúblika, Cidália Nobre Lopes Guterres, hateten objetivu hosi vizita ne’e atu fó apoiu solidariedade liuhosi fó apoiu nesesidade bázika ba vítima sira-ne’ebé sofre ba inundasaun.

“Ami-nia vizita ida ho objetivu fó asaun solidaride liuhosi fó apoiu nesesidade bázika ba ita-nia maluk sira-ne’ebé sofre ba inundasaun ida-ne’ebé boot tebes. Sasán no ai-han ne’ebé ami lori mai, ami hanoin katak lato’o saida mak ita-boot sira iha no lakon ona. Maibé, uitoan ka barak ne’ebé ami lori mai ne’e, hanesan asaun solidaridade ba malu iha situasaun defisil ida-ne’e,” Espoza Prezidente Repúblika, Cidália Nobre Lopes Guterres, hateten ba vítima sira bainhira vizita sentru evakuasaun FMA, tersa ne’e.

Espoza Prezidente Repúblika, Cidália Nobre Lopes Guterres. Imajen Tatoli/Arminda Fonseca.

Cidália Nobre Lopes Guterres hatutan, asaun solidariedade ida-ne’e atu hakbesik liu ba vítima sira, tanba loloos ne’e fó apoiu iha loron domingu ka segunda horisehik (05/04) maibé tanba inundasaun ne’ebé akontese kuaze afeta ba fatin-fatin entaun ohin mak foin bele fó apoiu.

“Ami mai fó apoiu uitoan tuir saida mak ami bele no iha lori mai. Ida-ne’e atu hatutan netik nesesidade ka presiza loron ida ka rua ninian, hodi ita akompaña nafatin situasaun kalamidade ida-ne’e. Tanba, hanesan ita hotu hatene katak sei iha udan no anin,” nia hateten.

Inan ba Nasaun ne’e dehan, daudaun ne’e sei iha mós família balun iha fatin-fatin ne’ebé triste no todan liu tanba balun lakon família tomak iha dezastre naturál ne’e, maibé fiar nafatin ba Estadu atu servisu hodi neutraliza situasaun ne’e.

“Sira ne’ebé lakon ona vida, ita reza ba Maromak nune’e bele hetan fatin di’ak. Ita ne’ebé sei moris, ita lolo-liman hamutuk, fó fiar nafatin ba ita-nia Estadu atu sira servisu másimu liután hodi neutraliza fila-fali ka atende lalais neseidade ne’ebé mak ita-nia komunidade presiza iha tempu defisil ida-ne’e,” nia hatutan.

Iha biban ida-ne’e, Espoza Prezidente Repúblika ne’e hato’o agreadese ua’in ba madre sira iha Komunidade Filhas de Maria Auxiliadora (FMA) Balide, tanba iha situasaun defisil nia laran ne’e bele oferese ona fatin ba vítima sira atu hamahon aan bá.

Sasán nesesidade báziku ne’ebé Espoza Prezidente ho nia komitiva fó ba vítima sira mak hanesan foos, Sedaap, Susu-been Indomilk, sabaun hariis, Biscuit Marie, sumu country choice, mina, Rinso, pepsodent no eskova, masin, masin-midar, xá, Energen, Manta klensol no Biti plastiku.

Vítima dezastre naturál ne’ebé hetan apoiu hosi Espoza Prezidente Repúblika ho nia komitiva ne’e hamutuk ema na’in-336 no totál uma-kain hamutuk-67.

Iha fatin hanesan, Madre Superiora, Filhas de Maria Auxilidora Balide, Angelita Gomes, hato’o agradese ua’in tebes ba Espoza Prezidente ne’ebé bele hakat ba sira-nia fatin hodi fó apoiu nesedidade báziku ba vítima sira.

“Ami hato’o agradese ua’in tebes ba Espoza Prezidente Repúblika tanba bele hakat mai ami-nia fatin fó apoiu ba ita-nia vítima sira,” nia hato’o agradesimentu.

Nia haktuir, vítima sira daudaun ne’e sei hela hotu sentru evakuasaun Filhas de Maria Auxiliador sira-nian tanba vítima sira-nia hela fatin seidauk bele hela.

“Loron, mane sira ba haree sira-nia uma no hadia, kalan sira fila mai toba iha iha fatin ne’e. Atividade loro-loron ami halo mak hanorin labarik sira hakerek no sura, tanba iha fatin ida-ne’e vítima maiória labarik mak barak,” nia hateten.

Antes Espoza Prezidente Repúblika vizita sentru evakuasaun refere, Espoza Prezidente vizita uluk sentru evakuasaun iha Madre SSPS iha Sabraka-Laran, Becora, Dili.

Jornalista: Arminda Fonseca

Editór: Cancio Ximenes.

PUBLISIDADEiklan

HAKEREK NO HATÁN

Please enter your comment!
Please enter your name here