DILI, 05 abríl 2021 (TATOLI)—Sekretáriu Estadu Kooperativa (SEKoop), Elizário Ferreira hamutuk ho Sekretáriu Estadu Juventude no Desportu (SEJD), Abrão Saldanha ‘Nokosiku’ fahe foos ba komunidade afetadu dizastre naturál iha aldeia Samatana, suku Bairro Pité, postu administrativu Dom Aleixo, munisípiu Dili.
“Ami lori foos saka 200 ba ita-nia komunidade afetadu inundasaun,” Sekretáriu Estadu Elizário informa ba Agência TATOLI hafoin distribui foos ba komunidade iha aldeia Samatana, segunda ne’e.
Iha fatin hanesan, Sekretáriu Estadu Abrão Saldanha, hateten distribuisaun foos ne’e bazeia ba levantamentu dadus hosi Xefe aldeia.
“Komunidade iha aldeia ne’e la konsege salva buat ruma, sira maka sofre liu no Bombeiru mós la konsege tama iha ne’e. Komunidade balun tuur iha uma leten no hein bee tun maka sira tun, tanba ne’e apoiu ne’e ami fó hodi aguenta hela loron hira ba oin atu hein apoiu boot hosi parte Governu ein jerál,” nia akresenta.
SEKoop hamutuk ho SEJD sei kontinua apoia emerjénsia ba komunidade afetadu inundasaun iha kapitál Dili.
“Ami sei kontinua apoia ba komunidade sira no ami mós sei fó hanoin ba Ministériu Saúde hodi fó tratamentu saúde ba komunidade sira iha aldeia ne’e,” nia tenik.
Nune’e mós, Xefe aldeia Samatana, Izaias Saul de Jesus Oliveira, hateten komunidade sira ne’ebé afetadu inundasaun iha aldeia hamutuk família 200.
“Kada família sei hetan saku ida hodi sustenta nesesidadede iha loron hirak nia laran,” nia katak.
Aleinde ne’e, líder komunitáriu ne’e husu ba ministériu kompetente atu fó mós nesesidade bázika hanesan toba fatin no tratameentu saúde tanba labarik sira barak maka mear, inus metin no kabun moras.
Jornalista: Natalino Costa
Editora: Julia Chatarina
