Kondisaun estrada Beduku hafoin inundasaun iha domingu (04/04). Imajen TATOLI/António Gonçalves.

DILI, 05 abríl 2021 (TATOLI)Governu liuhosi ministériu relevante husu ba emprezáriu sira, tantu lokál no internasionál atu mobiliza ekipamentu pezadu hodi normaliza impaktu dezastre naturál ne’ebé akontese iha territóriu Timór, liu-liu kapitál Dili ne’ebé hetan impaktu maka’as hafoin inundasaun iha domingu ne’e.

“Ministériu Planu no Ordenamentu (MPO) no Ministériu Obra Públika (MOP) orienta hotu setór privadu sira ne’ebé mak iha mákina boot (ekipamentu pezadu) atu mobiliza serbisu, hafoin estabalese mekanizmu atu nune’e komunidade sira bele kontribui iha esforsu halo limpeza jerál, hadi’a kanalizasaun bee, hadi’a dalan no valeta sira ne’ebé maka intupidu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun komisaun interministeriál ba protesaun sivíl no dezastre naturál, iha Palásiu Governu, segunda ne’e.

Ba kestaun ne’e, Govenu husu entidade sé de’it mak iha mákina ne’ebé kapasidade atu mobiliza, bele kontaktu ho MPO no MOP.

Serbisu normalizasaun estragu kauza inundasaun hahú ona desde domingu hafoin inundasaun espalla iha kapitál Dili.

Aleinde ne’e, Governu agradese kontribuisaun parte hotu ne’ebé halo hela servisu no husu atu kontinua liután atu lori rezultadu di’ak, nune’e halo kama’an difikuldade.

“Agradese ba entidade hotu, hanesan igreja, sosiedade sivíl, misaun diplomata sira ne’ebé iha Timór, no sira hotu ne’ebé fó apoiu hamutuk ho Timor-Leste atu nune’e bele ultrapasa situasaun difisil ne’e”, Portavós Governu agradese.

Iha sorin seluk, Kámara Komérsiu Indústria Timor-Leste (CCI-TL, sigla portugés) liuhosi Prezidente Oscar Lima, apela ba emprezáriu hotu, ne’ebé mak iha ekipamentu pezadu ou kamioneta atu partisipa hamoos sidade Dili no ba kestaun ne’e nia parte sei koordena ho autoridade munisípiu Dili.

“Husu atu fó apoia ba vítima dezastre naturál, tanba Vise-Primeiru Ministru no Ministru Planu no Ordenamentu husu emprezáriu lokál no internasionál atu hamutuk fó apoia,” nia dehan.

Nia mós husu entidade sira, liu-liu emprezáriu sira atu partisipa fó apoiu umanitáriu no entrega ba Sekretaria Estadu Protesaun Sivíl hodi kanaliza ba vítima dezastre naturál.

“Ba hirak ne’ebé laran luak la haluha hato’o agradese wain,”  nia agradese.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here