Auria Marques Fernandes ho ninia bebé kaduak evakua iha CVTL. Imajen TATOLI/Natalino Costa

DILI, 05 abril 2021 (TATOLI)–Auria Marques Fernandes ho ninia bebé kaduak foin semana ida, hela iha Bairro Pité, konsege salva-an hosi inundasaun ne’ebé akontese iha domingu (04/04).

“Ha’u-nia bebé na’in-rua foin halo semana ida, bainhira inundasaun joven sira salva uluk ha’u ho bebé, alin joven ida kateu ha’u no balun lori bebé, ami to’o estrada boot maka foin iha karreta privadu ida ajuda tula ami mai iha Bombeiru nia fatin, hafoin sira haree kondisaun ha’u ho oan nurak entaun lori ami mai iha Cruz Vermelha de Timor-Leste (CVTL, sigla portugés),” Auria Marques haktuir ba Agência TATOLI, iha edifísiu CVTL, Bairro Formosa, segunda ne’e.

Maski nune’e, sasán uma laran la konsege aproveita no salva hotu no evakua ho roupa tanan.

“Komunidade sira salva ha’u ho bebé  deit, sasán uma laran la salva no la aproveita hotu. Ami halai ho ropa ida iha isin to’o agora,” nia akresenta.

Tanba ne’e, nia husu Governu nia tulun atu tau matan ajuda nesesidade bázika ba nia ho ninia oan.

“Ami husu Governu atu apoia nesesidade ropa no sasán sira seluk, tanba ida ne’e dezastre.

Iha fatin hanesan, Juleta das Neves, sente triste tanba inundasaun ne’e fó risku ba nia ho ninia bebé fulan ida semana rua.

Juleta das Neves ho nia oan nurak. Imajen TATOLI/Natalino Costa

Nia haktuir, hanesan abitante ne’ebé hela iha Balide bainihira udan no bee sa’e, inan ho oan nurak ne’e evakua ba Eskola Sekundáriu 4 Balide, hafoin ekipa Bombeiru mai no haree kondisaun, lori kedan ba CVTL.

“Inundasaun ne’e estraga ami-nia uma. Bainhira ami fila labele hela ona iha ami-nia fatin tanba bee sobu hotu. Tanba ne’e, husu ba Governu, ami povu kiik, hatene la’ós obrigasaun atu ajuda ami maibé agora daudaun ami presiza tebes materiál hodi konstrui fali ami-nia uma,” nia dehan ho laran triste.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here