Intervensaun tékniku EDTL iha terrenu hafoin inundasaun iha kapitál Dili, iha domingu (04/04). Imajen/EDTL

DILI, 05 abríl 2021 (TATOLI)Eletricidade de Timor-Leste, Empreza Públika (EDTL,E.P) liuhosi  tékniku sira halo hela esforsu maka’as normaliza liña eletrisidade atubele lakan ho normál iha kapitál Dili inklui territóriu tomak.

Hafoin udan ho intensidade boot no provoka inundasaun iha kapitál Dili tomak iha domingu, EDTL konsege hamate ahi totál iha kapitál Dili, Ermera, Manatuto no Aileu, tanba dizastre naturál estraga infraestrutura eletrisidade iha fatin barak no fó biban ba tékniku sira hodi hadi’a tanba bee nalihun iha fatin-fatin.

Ahi mate hahú tuku 14:00 lorokraik to’o tuku 23:00 kalan mak komesa lakan iha fatin balun iha kapitál Dili.

Ministru Obra Públika, Salavador Eugênio Soares dos Reis Pires, informa, hafoin inundasaun iha ai-rin no sistema freederlubuk ida mak hetan estragu, maibé balun konsege normaliza ona maski seluk sei presiza atendimentu ba torre sira tanba iha munisípiu balun mós hetan impaktu erosaun no mota boot.

“Ita serbisu hamutuk ho parte hotu, liuliu liña ministeriál ho empreza estatál hodi halo normalizasaun, nune’e eletrisidade bele lakan normál iha territóriu tomak. Ita husu Xefe suku sira atu relata informasaun ba estragu hanesan ai-rin ou toree balun ne’ebé hetan estragu atu halo desizaun ruma ba reparasaun,” Ministru Salvador hateten iha Palásiu Governuc segunda ne’e.

Nia haktuir, hafoin dezastre naturál, sistema eletrisidade ho kondisaun grave tanba  ai-rin sira balun monu no tohar hodi afetada ba populasaun iha Dili no Munisípiu balun, tanba ne’e tenke hamte ahi.

“Ita presiza atende tuir ita-nia kapasidade, tanba kuaze ai-rin hotu monu no hetan estragu, ne’ebé iha parte balun ahi lakan maibé seluk seidauk. Entaun normaliza ona no parte balun ne’ebé seidauk lakan daudaun ne’e ekipa sira esforsu hela atu normaliza,” nia akresenta.

Entretantu, EDTL antes ne’e informa ona ba kliente sira hafoin dezastre naturál katak tékniku halo kedas intervensaun ba liña distribuisaun sira ne’ebé avaria tanba ai-rin monu no tohar, fiu kotu tanba rai halai no bee mota maka’as iha kapital Dili, maibé daudaun maioria feeder ho 80% lakan filafali.

Enkuantu, feeder I no VI mak la konsege tanba tempu, maibé ohin loron tékniku sira kontinua buka tuir fatin avaria hodi  atende no normaliza hikas.

Daudaun feeder I iha parte balun lakan ona no parte balun seidauk, tanba ne’e parte EDTL husu pasiensia ba kliente hotu atu fó biban tékniku sira hadi’a eletrisidade hikas pur faze atu prevene sasán a’at no ahi han uma.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here