Kondisaun atmosfera atuál iha Timor-Leste. Imajen/DMNG

DILI, 05 abríl 2021 (TATOLI)Diresaun Nasionál Metrolojia no Jeofízika (GNMG, sigla portugés) rejeita informasaun ne’ebé espalla iha públiku (rede sosiál) katak komesa ohin loron (05/04) ba oin, Timor-Leste ameasadu enfrenta Tasi sa’e no anin boot ka Tsunami.

“DMNG klartifika katak sistema meteorolójiku baixa presaun (low pressure) ne’ebé molok ne’e lokaliza iha Tasi Timór no agora daudaun dezloka ona ba tasi Nusa Tenggara Timur (NTT) sei la implika Tsunami iha territóriu nasionál Timor Leste,” refere nota ne’ebé Agência TATOLI asesu iha segunda ne’e.

Nota ne’e esplika, sistema refere desloka ka ses ona hosi ilha Timór, maibé Timor-Leste sei nafatin akontese udan no anin ho intensidade fraku no moderadu, prinsipalmente iha kosta norte, rejiaun sentrál inklui Rejiaun Administrativa Espesiál Oé-cusse Ambeno (RAEOA).

“Signifika katak iha loron hirak tuir mai laiha probabilidade atu hamosu eventu extreme ruma ligasaun ho atmosfera no tasi iha territóriu nasionál,” akresenta.

Ho nune’e, diresaun ne’ebé tutela ba Ministériu Transporte no Komunikasaun (MTK) ne’e konsidera informasaun ne’ebé espalla relasiona ho tempu iha Timór hanesan informasaun falsu.

“DNMG konsidera katak publiksaun hirak ne’e falsu ka hoax tanba fontes ne’ebé fó informasaun falsu hirak ne’e la’ós profisionál iha ninia área no la iha ligasaun ho instituisaun relevante ne’ebé mak toma konta ba dezastre iha Timor-Leste no informasaun sira ne’e la tuir padraun servisu meteorolójiku no Jeofísika nian,” klarifika nota ne’e.

DNMG mós simu mensajen ho dúvida no kestiona hosi públiku ne’ebé husu kona-ba kondisaun tempu, liu-liu atu hatene ‘udan bainhira mak bele para’.

“Ami sempre fó informasaun no previzaun tempu loron-loron liuhosi rede sosiál (DNMG Timor leste), Blog DNMG no Rádiu Televizaun Timor-Leste (RTTL) iha programa (Kafe dader no Gazeta 24 horas), aleinde ne’e sempre fahe ba instituisaun relevante sira hanesan, Sekretaria Estadu Protesaun Sívil, mídia sira inklui rádiu komunidade ne’ebé eziste iha territóriu Timór laran no ajénsia sira ne’ebé serbisu ba redusaun risku dezastre,” subliña.

DNMG uza tipu avizu meteorolójiku hanesan avizu jerál bainhira observa no analiza kondisaun tempu iha estadu normál ka neutru (ezemplu: udan, anin ho intensidade fraku ba moderadu).

Bainhira uza ‘Atensaun’ mak atu observa no analiza kondisaun tempu ho intensidade moderadu ba forte no atensaun espesiál mak uza bainhira observa no analiza kondisaun tempu ho intensidade forte ba forte liu.

Ikus liu, ‘Alerta’ mak uza bainhira observa no analiza kondisaun tempu extremu (extreme weather/cuaca buruk).

Ho nune’e, DMNG husu ba komunidade ein jerál iha territóriu nasionál tomak atu mantein kalma no nafatin akompaña informasaun ba kondisaun tempu hosi fonte ne’ebé konfiável no kredível liu-liu instituisaun ka autoridade ne’ebé servisu iha ramu Redusaun Risku Dezastre (RRD).

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here