Fatin mahon provizóriu ba vítima dezastre naturál iha Bairro João Paulo II, domingu (04/04). Imajen TATOLI/Domingos Piedade Freitas

DILI, 04 abríl 2021 (TATOLI)—Uma-kain 30 iha Bairro João Paulo II, aldeia 12 de Outubro, suku Comoro, postu administrativu Dom Aleixo, munisípiu Dili ne’ebé sai vítima dezastre naturál menus ai-han, tanba ne’e abitante sira husu apoia ba parte relevante.

“Ami husu ba maun boot sira atubele tau-matan ba atan-oan sira ne’ebé mak hela iha Bairro João Paulo II, tamba kauza hosi inundasaun sa’e maka’as, halo populasaun barak mak husik hela fatin no labele deskansa ho di’ak,” Abitante Madalena José, hatetn ba Agência TATOLI, iha fatin refujiadu, Tasi Tolu, domingu ne’e.

Abitante Bairro João Paulo II, Madalena José. Imajen TATOLI/Domingos Piedade Freitas

Nia dehan, abitante sira hahú evakua iha domingu madrugada, ne’ebé sei akompaña ho udan boot, hodi buka mahon no bele deskansa.

“Udan hosi lagoa mak sa’e fali mai populasaun sira-nia hela fatin iha Tasi Tolu. Sasán sira iha uma laran la aproveita hotu kedas no daudaun ami okupa fatin refujiadu, uma no kareta Estadu ne’ebé mak a’at ona ami hamos hodi satán netik ulun no deskansa,” nia akresenta.

Vítima sira deside evakua ba fatin ne’ebé konsidera favorável hodi bele aguenta iha loron balun, maibé sasán barak labele salva tanba bee sa’e maka’as iha tempu kalan.

Vítima dezastre naturál iha Bairro João Paulo II, domingu (04/04). Imajen TATOLI/Domingos Piedade Freitas

“Salva vida mak importante liu. Oras ne’e ami seidauk konsege hato’o ba autoridade lokál, maibé ho akontesimentu iha kapitál Dili, husu maun boot sira bele solusiona lalais problema ne’e,” nia hatutan.

Tuir observasaun Jornalista Agência TATOLI iha terrenu, nota katak fatin mahon provizóriu ne’e iha labarik kiik-oan barak.

Jornalista: Domingos Piedade Freitas

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here