Prezidente Repúblika, Francisco Guterres 'Lú-Olo'. Imajen TATOLI/António Gonçalves

DILI, 04 abríl 2021 (TATOLI)–Prezidente Repúblika (PR), Francisco Guterres ‘Lú olo’, hato’o solidariedade ba povu Timor-Leste, liuliu populasaun iha kapitál nasaun, Dili, ne’ebé afetadu ba inundasaun.  

“Hakarak hato’o ba povu tomak iha Timor-Leste, partikularmente populasaun kapitál Dili, ita hotu sofre dala-ida tan dezastre boot dezde iha tuku 02:00 madrugada to’o mai ohin dader, udan boot hodi hamosu inundasaun ba ita-nia kapitál Dili,” Prezidente Repúblika hato’o solidariedade liuhosi konferénsia imprensa iha ninia rezidénsia, Farol, domingu ne’e.

Xefe Estadu konsidera, dezastre naturál ne’ebé akontese nu’udar kalamidade boot ida, enkuantu Timor-Leste daudaun ne’e hasoru hela kalamidade ida hanesan COVID-19.

“Situasaun ida-ne’e, ha’u bele kompara hanesan kalamidade boot ida, seluk maka Coronavírus ne’ebé mak ita enfrenta hela daudaun maibé mosu tan ida-ne’e hodi husik hela terus ba ita-nia povu,” nia akresenta.

PR mós rona ona informasaun katak  iha sidadaun balun maka lakon vida tanba dezastre naturál ne’e.

“Ohin, pelu menus tuir informasaun ne’ebé simu katak iha na’in-sia mak mate, sira  terus tebes, Prezidente Repúblika hakarak hato’o sentidu pézamez ba família ne’ebé mak lakon no mós solidariedade tomak ba populasaun iha kapitál Dili no populasaun Timor-Leste,” nia katak.

Prezidente Repúblika fiar, Governu sei fó apoia ba vitíma dezastre naturál sira maibé sei halo uluk lavantamentu dadus.

“Ha’u hein katak ita situasaun ida ne’e nia laran Governu halo levantamentu ida atubele hatene loloos dezastre ne’e fó prejuízu hira ba populasaun sira no mós mate hira? maski iha ona informasaun katak iha ona na’in-sia mak mate no bele liután ida ne’e, maibé Governu sei halo levantamentu dadus para hatene loloos hodi ajuda,” nia hatutan.

Ho situasaun, Prezidente Repúblika konvida entidade hotu halo reflesaun sériu, liuliu kona-ba ukun ninian.

“Hakarak fó hatene ba populasaun sira tomak, dezastre iha Dili ho ida ne’e dala-rua, dahuluk akontese iha tinan kotuk (2020) no mós ohin kona filafali iha sidade Dili. Dezastre ida ne’e lori ita atu halo reflesaun sériu, liuliu kona-ba ita-nia ukun tinan 10,” nia fó hanoin.

Xefe Estadu subliña, nia parte sei lakohi fó sala ba ema ida, nein fó sala ba ukun-na’in sira maibé husu atu halo reflesaun.

“Ha’u hakarak husu de’it atu hotu-hotu halo reflesaun sériu, oinsá ita bele hadi’a ita-nia kapitál atu labele fó susar ida-ne’e nafatin ba ita-nia povu. Ha’u dezeja imi hotu di’ak nafatin, haku’ak boot ba povu doben Timor-Leste,” PR Lú Olo enkoraja.

Jornalista: Antónia Gusmão

Editora: Julia Chatarina  

PUBLISIDADEiklan

HAKEREK NO HATÁN

Please enter your comment!
Please enter your name here