Imajen espesiál

DILI, 04 abríl 2021 (TATOLI)–Dadus provizóriu hosi Sekretaria Estadu Protesaun Sivil (SEPS), domingu ne’e, iha Dili, relata ema na’in ualu (8) mak mate kauza hosi dezastre naturál ka udan no anin boot ne’ebé akontese dezde sábadu kalan to’o ohin.

Hosi vítima sira ne’ebe mate mak hanesan joven maun no alin iha área Beduku, Suku Comoro no Bairru-Pité mak membru polísia ida hosi Unidade Batallaun Órden Públika (BOP) no mós iha Bidau ferik ida, feto klosan ida no labarik nai’n ida.

Vítima sira-ne’e mate tanba balun rai hanehan ne’ebé hela besik iha foho lolon no balun inundasaun bee lori.

Sekretariu Estadu Protesaun Sivíl, Joaquim Gusmão, hateten ba Agência Tatoli, iha Sentru Operasaun Bombeiros Kampung Baru, Comoro, katak ekipa SEPS mós seidauk identifika númeru ho loloos kona-ba vítima sira ne’ebé hetan kanek.

Tanba problema ne’e, SEPS Joaquim hala’o kedas enkontru entre ekipa SEPS no parseiru dezenvolvimentu sira hanesan Plan Internasional, Cruz Vermelha Timor-Leste, Care Internasional ho sira seluk hodi bele halo atuasaun efetivu liután hodi evakua komunidade ne’ebé sofre inundasaun.

SEPS mós daudaun prepara ona sentru ba fatin evakuasaun hanesan Don Bosco Comoro, Jináziu, edifísiu Jestaun Risku Dezastre iha Bemori ho edifísiu SEPS rasik.

Nia haktuir, kuaze iha Dili laran afeta inundasaun hanesan komunidade hela besik mota Comoro, Tasi Tolu, Becusse, Bidau ho fatin sira seluk ne’ebé bee tama estraga sasán.

Tuir Joaquim, importante agora ekipa Bombeiros no Jestaun Risku Dezastre iha terenu hodi koordena ho autoridade lokál hodibele identifika família afetadu para evakua ba fatin seguru.

“Ita nia foku agora ba vitima sira ferik no katuas, labarik no inan-feton ne’ebé isin rua hodi halo evakasaun ba fatin ne’ebé mak seguru,” nia esklarese.

Iha parte seluk, Joaquim haktuir udan boot la’ós akontese iha Dili de’it maibé iha territóriu laran tomak hanesan daudaun ekipa pontu vokál SEPS rekolla iha Covalima, RAEOA no munisípiu seluk ne’ebé afetadu inundasaun.

Nia apela ba komunidade liuliu hirak ne’ebé hela iha fatin risku dezastre hanesan iha mota ninin ho foho lolon bainhira udan to’o oras ida ona di’akliu evakua iha fatin ne’ebé seguru, labele hein to’o udan maka’as no rai halai ho monu mak sees an.

Jornalista: Nelson Sousa
Editór: Xisto Freitas

HAKEREK NO HATÁN

Please enter your comment!
Please enter your name here