Matebian nia bin tuur hein hela matebian nia isin mate ne’ebé latan iha kama-laran iha matebian nia uma iha Aldeia Masin Lidun, Lagoa Tasi-Tolu, Suku Comoro, Postu Administrativu Don Aleixo, Munisípiu Dili, sesta (02/04/2021). Imajen/Espesiál

DILI, 02 abríl 2021 (TATOLI)–Komunidade iha Aldeia Masin Lidun, Lagoa Tasi-Tolu, Suku Comoro, Postu Administrativu Don Aleixo, Munisípiu Dili, sesta-feira Santa ne’e, hakfodak rona inan-feto Filomena  Fátima, mate ho kondisaun tara-an iha nia uma-laran.

Sasin sira nu’udar viziñu besik matebian Filomena Fatima, haktuir ba jornalista sira  iha mate-uma katak, sira deskonfia matebian tara-aan iha kinta kalan (01/04), tanba iha loron, sira sei haree matebian halo hela atividade iha uma okos hanesan baibain.

Viziñu sira konversa hela iha matebian Filomena Fatima nia uma oin. Imajen/Espesiál

Florentina Maia Soares nu’udar matebian nia inan hakiak hatuir katak iha loron-rua, molok matebian tara-aan, tersa (30/03),  nia (matebian, red) sei husu hela foos ba nia no viziñu sira balun konsege  fó duni foos lata-tolu hodi sira te’in ba han.

“Derrepente, ohin dadeer, ami hotu foin hakfodak rona matebian mate ho kondisaun tara-aan,” Florentina Maia Soares hateten.

Nia fó sasin katak matebian nia kondisaun moris uma-laran nian arraska, laiha buat ida iha uma okos no matebian nia katuas-oan viajen hela ba Ermera seidauk bele fila tanba Dili implementa hela regra Serka Sanitaria (SS).

“Talvés nia hanoin barak ho situasaun moris ninian. Nia ba husu duni foos, ha’u dehan haree ema balu foos iha karik ajuda foti lai ba, nune’e nia mós fila mai uma kala hanoin barak no ohin  rona fali dehan nia tara-aan,” Florentina Maia Soares tenik.

Agência Tatoli halo mós entrevista ho Jacob da Cruz,  nu’udar viziñu iha mate-uma dehan katak, matebian nia kondisaun moris susar tebe-tebes no foos uitoan atu han de’it mós laiha.

“Nia husu duni foos ba viziñu sira no bainhira sira han hotu ona foos ne’e, nia atu husu tan mós sente ladún di’ak. Ami hakfodak nia mate ho kondisaun  tara-aan,” Jacob hateten.

Matebian Filomena Maia Soares, iha oan na’in-haat (4) kompostu hosi mane  na’in-tolu no feto ida. Mane na’in-tolu hela ho sira-nia aman iha Ermera no matebian hela ho oan feto ida ne’e iha sira-nia uma iha Aldeia Masin Lidun, Lagoa Tasi-Tolu, Dili.

Jacob fó sasin katak mezmu sira moris ho kondisaun ne’ebé susar tebes, maibé matebian laiha problema ho viziñu, inklui nia kaben ne’ebé daudaun ne’e hela iha Ermera.

Daudaun ne’e, matebian nia oan feto ne’e iha ona nia inan hakiak Florentina hodi tau-matan no kontaktu ona família sira hosi Ermera bele koordena ho polísia atu mai haloot mate-isin no prepara ba serimónia funerál.

Joanita Leite, nu’udar mós viziñu ho matebian hateten durante ne’e nia ajuda fó foos dala-tolu ba matebian hodi te’in ba nia ho nia oan sira han.

“Matebian mai husu foos ha’u maka fó duni,” Joanita Leite hateten.

Jornalista   : Eugénio Pereira

Editór          : Francisco Simões

HAKEREK NO HATÁN

Please enter your comment!
Please enter your name here