Ministru Koordenadór Asuntu Ekonómiku, Joaquim Amaral, fó pose ba Inspetór Jerál AIFAESA, Ernesto Monteiro, iha salaun AIFAESA, Vila-verde, kinta (01/04). Imajen/Natalino Costa

DILI, 01 abríl 2021 (TATOLI)–Ministru Koodenadór Asuntu Ekonómia (MKAE), Joaquim Amaral, fó pose Ernesto Monteiro, nu’udar Inspektór Jerál Autoridade Inspesaun no Fiskalizasaun Atividade Ekonómika Sanitária no Alimentar (AIFAESA) ba mandatu tinan tolu.

Iha diskursu, Ministru Joaquim, hateten, Inspetór Jerál atu kompleta estrutura instituisaun no troka Koordenadór Jerál AIFAESA, Abílio Oliveira Sereno, ne’ebé nia mandatu hotu ona iha loron 30 marsu.

“Husu Inspektór Jerál foun bele garante direitu konsumidór no garante ekonomia liuhosi ai-han no sasán ne’ebé tenke prenxe padraun ein termu kualiadade tuir konsumidór nia hakarak,” Governante ne’e dehan , iha salaun AIFAESA, Matadoru, kinta ne’e.

Nia fó ezemplu, bainhira tau iha embalajen produtu dehan litru ida, tenke garante duni katak kuantidade hanesan, nune’e mós kona-ba prazu ai-han, bainihira liu ona prazu labele fa’an ona hodi labele prejudika konsumidór sira.

Iha fatin hanesan, Inspektór Jerál AIFAESA, Ernesto Monteiro, agradese ba konfiansa VIII Governu Konstitusionál liuhosi MKAE ne’ebé atribui ba nia, tanba ne’e promete sei halo serbisu ho di’ak.

“Ha’u sei halo knaar tuir kbiit ne’ebe maka iha. Durante mandatu, sei foku ba legalidade, ne’ebé kualker atividade ekonómika tenke iha baze legál, seluk maka sei aposta ba kualidade no kuantidade,” nia afirma.

Iha biban hanesan, Koordenadór AIFAESA sesante, Abílio Oliveira Sereno, agradese tanba hetan fiar lidera AIFAESA durante  tinan haat fulan neen nia laran.

“Durante mandatu iha dezafiu no problema oin-oin, maski nune’e iha serbisu balun maka la’o di’ak no atinje buat balun,” nia dehan.

Nune’e, nia parte deseju Inspektór Jerál emposadu bele mellora liu serbisu ne’ebé durante ne’e seidauk atinje.

Entertantu, seremónia pose ne’e partisipa mós hosi Ministru Turizmu Komérsiu no Indústria, José Lucas do Carmo da Silva no Dirijente ajénsia autónomu ne’ebé tutela ba MKAE.  

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here