Profisionál saúde halo teste swab ba abitante iha Fatumeta, Dili, segunda (15/03). Imajen TATOLI/António Gonçalves

DILI, 01 abríl 2021 (TATOLI)–Konsellu Ministru (KM) aprova ona alterasaun, projetu Dekretu Governu, ne’ebé aprezenta hosi Primeiru-Ministru (PM), Taur Matan Ruak, kona-ba medida ezekusaun deklarasaun Estadu Emerjénsia (EE) da-XII hosi Dekretu Prezidente Repúblika númeru 17/2021, loron 31 marsu, hodi hatán ba pandemia COVID-19.

Ministru Prezidénsia Konsellu Ministru, Fidelis Manuel Leite Magalhães, hateten EE da XI vigora hela to’o 02 abríl, no daudaun renova, abranje territóriu nasionál tomak no vigora entre oras 00:00 loron 03 abríl to’o oras 23:59 loron 02 maiu 2021.

“Medida ne’ebé impoin iha diploma ne’e maka hanesan ho Dekretu Governu anteriór, ne’ebé define ona regra ezekusaun Estadu Emerjénsia, maibé ida agora destaka de’it katak ba oin ema hotu ne’ebé suspeita infesaun ka hetan kontaktu ho individu infetadu COVID-19, iha obrigasaun sujeita ba teste hodi deteta infesaun hosi Coronavírus foun,” Ministru Fidelis relata hafoin reuniaun ezekutivu iha Palásiu Governu, kinta ne’e.

Nia dehan, mantein nafatin medida anteriormante ne’ebé aprova ona no hala’o hela, liuliu proibisaun pasajen fronteira terrestre ba objetivu tradisionál ka kustumeiru inklui ba asesu merkadu reguladu sira.

Individu hotu ne’ebé hakarak tama ka sai hosi territóriu, kontinua sujeitu ba kontrolu sanitáriu, hodi impede sirkulasaun internasionál ba ema hotu ne’ebé hatudu sintomaa infesaun COVID-19.

Mantein impozisaun izolamentu profilátiku (kuarantena) obrigatóriu ba sidadaun hotu ne’ebé tama iha territóriu nasionál hosi estranjeiru, ne’ebé hatudu sintoma ka suspeitu infetadu COVID-19, maibé ninia rezultadu teste la konkluzivu, refere ba profisionál saúde sira ne’ebé serbisu iha sentru izolamentu maka tau-matan ba infetadu ka ne’ebé iha kontaktu besik hela hamutuk ka partilla ambiente ne’ebé hanesan ho ema ne’ebé sofre moras COVID-19 nian.

Despeza izolamentu iha rezidénsia privadu responsável individuál

Despeza sira kona-ba izolamentu profilátiku hosi individu idaidak bainhira kumpre ona iha estabelesimentu saúde, rezidénsia ka iha sentru izolamentu privadu.

Notísia relevante: Medida EE da-XII, kuarentena bele iha uma ho despaisu MS

Enkuantu individu hotu ne’ebé diagnosa ona COVID-19 tenke sujeitu ba izolamentu terapéutiku, ne’ebé sei bele kumpre iha nia hela fatin, tuir despaisu Ministra Saúde nian.

Durante vijénsia diploma ne’e nian, ema hotu ne’ebé hela iha Timor- Leste, kontinua iha obrigasaun atu mantein distánsia pelumenus metru ida hosi ema seluk ne’ebé ho nia la hela hamutuk iha uma ida.

Iha obrigasaun mós atu utiliza máskara oin ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza, no fase liman bainhira hakarak tama ba estabelesimentu komersiál, industriál ka prestasaun servisu ka ba edifísiu sira ne’ebé  servisu administrasaun públika nian funsiona.

Aleinde ne’e, iha obrigasaun mós atu  evita formasaun halibur-malu iha dalan públiku.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here