Koordenadór Estadu-Maiór Sala Situasaun-CIGC, Komodoro Donaciano Costa Gomes 'Pedro Klamar Fuik'. Imajen/IDN

DILI, 01 abríl 2021 (TATOLI)–Sala Situasaun-Sentru Integradu Jestaun Krize (CIGC, sigla portugés), rekomenda ba Governu atu kria kritéria kontrola ema ne’ebé hala’o kuarentena no izolamentu iha rezidénsia privadu.

“Tenke haree oinsá kria kritéria ida ba auto izolamentu no auto kuarentena, ne’ebé tuir rekomendasaun hosi Ministériu Saúde (MS). Buka meiu sira atu diskute kona-ba atribuisaun kompeténsia, nune’e bele hatene sé maka atu halo supervizaun,” Koordenadór Estadu-Maiór Sala Situasaun-CIGC, Komodoro Donaciano Costa Gomes ‘Pedro Klamar Fuik’, relata iha ámbitu reuniaun Konsellu Ministru, via virtuál, hanesan haktuir iha nota ne’ebé Agência TATOLI asesu, kinta ne’e.

Tuir koordenadór, estabelesementu kritéria importante atubele define sé loos mak iha kompeténsia kontrola sidadaun iha auto kuarentena no izolamentu.

“Médiku sira maka atu kontrola loron tomak ka  Ofisiál Polísia Suku (OPS) no autoridade komunitáriu sira. Nune’e ba kestaun ne’e, tuir Sala Situasaun presiza iha kobertura jurídika ida hosi Governu hodi legaliza iha implementasaun,” Atuál Diretór Institutu Defeza Nasionál (IDN) ne’e rekomenda.

Notísia relevante: Medida EE da-XII, kuarentena bele iha uma ho despaisu MS

Iha ámbitu reuniaun ezekutivu aprova ona alterasaun, Projetu Dekretu Governu, ne’ebé aprezenta hosi Primeiru-Ministru, Taur Matan Ruak, kona-ba medida ezekusaun deklarasaun Estadu Emerjénsia da-XII hosi Dekretu Prezidente Repúblika númeru 17/2021, loron 31 marsu, hodi hatán ba pandemia COVID-19.

Dekretu Governu ne’e haktuir, mantein impozisaun izolamentu profilátiku (kuarantena) obrigatóriu ba sidadaun hotu ne’ebé tama iha territóriu nasionál hosi estranjeiru, ne’ebé hatudu sintoma ka suspeitu infetadu COVID-19, maibé ninia rezultadu teste la konkluzivu, refere ba profisionál saúde sira ne’ebé serbisu iha sentru izolamentu maka tau-matan ba infetadu ka ne’ebé iha kontaktu besik hela hamutuk ka partilla ambiente ne’ebé hanesan ho ema ne’ebé sofre moras COVID-19 nian.

Aleinde ne’e, despeza sira kona-ba izolamentu profilátiku responsabiliza hosi individu idaidak bainhira kumpre ona iha estabelesimentu saúde, rezidénsia ka iha sentru izolamentu privadu.

Enkuantu, individu hotu ne’ebé diagnosa ona COVID-19 tenke sujeitu ba izolamentu terapéutiku, ne’ebé sei bele kumpre iha ninia hela fatin tuir despaisu MS nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here