DILI, 30 marsu 2021 (TATOLI) – Dezde aplikasaun regra serka sanitária, hosi loron 08 marsu to’o agora, Polísia Nasionál Timor-Leste (PNTL) detein ona Timor-oan no estranjeiru sira hamutuk na’in 400-liu tanba viola regra refere.
Segundu Komandante PNTL Munisípiu Dili, Superintendente Euclides Belo, afirma polísia detein abitante sira ne’e bainhira halo atividade ezersísiu iha tasi ibun, jardín hodi halibur malu grupu, joga karta, joga bingo no bola guling ne’ebé konsidera viola regra serka sanitária no konfinamentu obrigatóriu iha Munisípiu Dili.
Rezolusaun Governu haktuir, durante períodu serka sanitária no konfinamentu obrigatóriu iha Dili, kontinua taka postu fronteira iha munisípiu ne’e no bandu sirkulasaun ema hosi Dili ba munisípiu seluk, exetu iha kazu emerjénsia ho razaun seguransa, saúde públiku, umanitária ka seluk ne’ebé nesesáriu.
“Ema 400-resin maka ita halo identifikasaun, tantu feto no mane, mai detein depois sosializa regra ba sira haruka fila para bele kumpre regra serka sanitária ne’e,” Superintendente Euclides Belo informa ba jornalista iha Komandu PNTL Munisípiu Dili, tersa ne’e.
Nia husu ba públiku atu labele kestiona servisu PNTL nian bainhira implementa regra serka sanitária iha Dili hodi ajuda Governu no sosiedade luta hasoru propagasaun COVID-19 ne’ebé rejista ema na’in-342 pozitivu.
PNTL sei kontinua hasa’e volume operasaun iha kapitál Dili hodi evita abitante sira labele viola regra ne’e tuir sira nia hakarak.
Komandu PNTL Dili rasik koordena ho membru Konsellu Polísia Komunitária (KPK) iha Dili hamutuk 1.600 hodi pasa informasaun loro-loron ba polísia hodi kontrola sitasaun iha Dili.
Sei investiga motorista ambulánsia hemu tua iha kuarentena
Segundu Komandante PNTL Munisípiu Dili, Superintendente Euclides Belo informa mós katak sira-nia parte sei halo investigasaun ba ekipa motorista ambulánsia sira ne’ebé deskonfia hemu tua iha área kuarentena laran.
Euclides dehan, PNTL sei koordena ho Ekipa Ministériu Saúde parte Pilar VII atu justifika fotografia ne’ebé ekipa hasai viral iha rede sosiál Facebook hodi bele evita kazu ne’e labele akontese tan.
Euclides rekoñese, fotografia ne’ebé viral iha Facebook hetan kritika maka’as ema barak nu’udar pasu importante hodi ekipa ambulánsia sira bele hadi’a sira-nia frakeza.
“Ami PNTL labele kondena uluk lai ema sira ne’e, maibé ita sei halo konfirmasaun ho parte kolega motorista ambulánsia no diretór sira kuandu haree iha irregularidade ruma hosi pesoál sira komete, ami sei komunika ba malu hodi hadi’a,” Euclides Belo hateten
Komandu PNTL destaka membru sira halo seguransa iha fatin kuarentena no sala izolamentu sira sempre aplika ho regra sira hanesan, bandu pasiente sira hemu tua, fuma sigarru, hasoru família no halo movimentu ba mai iha kuarentena laran.
Jornalista : Eugénio Pereira
Editór : Francisco Simões
