Primeiru-Ministru, Taur Matan Ruak, akompaña ho Prokuradór Jerál Repúblika, José Ximenes, vizita edifísiu PGR iha Colmera, kinta (17/09). Imajen Tatoli/Egas Cristovão

DILI, 30 marsu 2021 (TATOLI)-Prokuradór Jerál Repúblika (PGR, sigla portugés), José da Costa Ximenes, iha fulan abríl, tinan ne’e, termina ona nia mandatu hanesan PGR. Tanba ne’e, nia sei submete relatóriu servisu durante nia mandatu ba Parlamentu Nasionál (PN) iha tempu badak nia laran.

Prokuradór Jerál Repúblika, José Ximenes. Imajen Tatoli /Egas Cristovão

José da Costa Ximenes hala’o mandatu nu’udar lider másimu iha instituisaun PGR ba dala-rua ona, hahú hosi 2013 to’o 2017 (primeiru mandatu) no kontinua extende tan hosi 2017 to’o 2021 (segundu mandatu).

PGR nomeia no ezonera hosi Prezidente Repúblika, hafoin rona tiha Governu, entre majistradu sira Ministériu Públiku nian no Juis-de-direito sira ne’ebé ho kategoria la inferiór hosi 1ª klase, ba mandatu tinan-haat, renova, dala ida de’it, ba períodu hanesan.

Dezde loron 15 abríl 2013, kargu PGR ne’e okupa hosi José da Costa Ximenes, ne’ebé iha loron 28 abríl 2017, simu posse ba ninia mandatu daruak hosi Prezidente Repúblika tempu ne’ebá Taur Matan Ruak.

Molok termina nia mandatu nu’udar PGR, José Ximenes hateten,  nia sei relata ka hato’o relatóriu informasaun annual no progresu servisu durante nia mandatu ba Parlamentu Nasionál (PN) iha fulan abríl, tinan ne’e.

José Ximenes, informa daudaun nia prepara ona relatóriu ba informasaun annual PGR nian no mós progresu servisu ne’ebé hala’o durante nia mandatu hodi haruka ba Parlamentu Nasionál atu bele ajenda iha plenária.

Ba jornalista, tersa ne’e, iha Parlamentu Nasionál, PGR José Ximenes, lakohi la adianta uluk informasaun sira kona-ba progresu servisu durante nia atinje ho rekomendasaun sira balun, tanba matéria sira-ne’e nia sei aprezenta ba iha PN.

“Ba figura foun Prokuradór Jerál Repúblika periodu 2021-2025, Prezidente Repúblika nia kompeténsia,’’ José Ximenes hateten.

Hala’o kna’ar Konstitusionál

Komísariu CAC, Sergio Hornai. Imajen TATOLI/Egas Cristovão

Hosi sorin seluk, Komisáriu Komisaun Anti-Korrupsaun (CAC), Sergio Hornai, hateten CAC sai mós hanesan órgaun Estadu independente ne’ebé koordenasaun servisu efetivu ho Prokuradoria Jerál Repúblika (PJR) durante ne’e.

Tuir CAC nia haree kona-ba servisu sira Prokuradór Jerál Repúblika (PGR), José da Costa Ximenes nian durante ne’e tuir mandatu Konstitusionál.

Sergio Hornai, dehan, durante mandatu PGR José Ximenes nian ezerse funsaun ho prinsípiu tuir lei iha Estatutu Ministériu Públiku (MP) ne’ebé fó atribuisaun tuir kompeténsia ba iha PGR oinsá dirijente másimu hosi PGR atu reprezenta instituisaun lori naran Estadu ba iha problema sira ne’ebé mak mosu iha komunidade, liu-liu ba litíjiu sira ne’ebé mosu tantu iha krime ordináriu no estraordináriu, krime korrupsaun ho matéria kontensiozu administrativu.

CAC nia preferénsia ba ema ho kompeténsia atu pertense ba  asume kna’ar PGR iha mandatu foun 2021-2025 mak timoroan tenke prienxe rekizitu  bele mai rasik hosi prokuradór la bele inferior hosi primeira klase no bele hili juis sira ne’ebé kualifikadu iha primeira klase.

“Nomeasaun kargu no ezonerasaun Prokuradór Jerál Repúblika hosi Prezidente Repúblika, hafoin rona tiha Governu no Konsellu Superior Ministériu Públiku,” Komisáriu CAC, Sergio Hornai ba Agência Tatoli via telefone, tersa ne’e.

Nia hateten, CAC nu’udar órgaun polisiál espesializada sai hanesan koazuvador ba MP durante ne’e hala’o kooperasaun servisu efetivu tebes ho autoridade judisiál hanesan Ministériu Públiku no mós servisu kooperasaun institusionál hanesan koordenasaun devér espesiál sira.

Dadus  2020 ne’ebé iha hatudu katak  CAC halo investigasaun ba kazu hamutuk 73 no prosesu 43 remesa ona ba iha Ministériu Públiku ho finalidade bele hadi’a no bele halo ona akuzasaun ba Tribunál no ba kazu sira ne’e kompleksu hanesan korrupsaun envolve autoridade sira ne’ebé iha funsaun públiku, liu-liu iha liña ministerial no mós instituisaun Estadu sira.

“Kazu sira ne’e ita husu responsabilidade kriminál no indemnizasaun,” Sergio Hornai hateten.

Hatán kona-ba kazu sira ne’ebé CAC enkamiña ona ba MP ninia rezultadu oinsa, Sergio Hornai, la esplika númeru detallu maibé kazu sira ne’e balun halo hela apresiasaun liután hodi hametin konviksaun MP ninian tuir rezultadu investigasaun ne’ebé CAC halo.

Nia hateten, kona-ba lejizlasaun sira ne’ebé fó kompeténsia ba PGR atu hala’o ninia kna’ar asaun penál nian ho independente no integridade la’ós iha estatutu MP nian de’it, maibé iha prinsípiu lei konstituisaun hakarak ba órgaun judisiál sira hotu-hotu tenke asegura legalidade, imparsialidade, independente no mós halo servisu objetividade.

Sergio Hornai, rekoñese katak dezafiu ida mós ba PGR maka durante ne’e seidauk iha lei estradisaun atu ajuda PGR no Tribunál bele hala’o mandadu detensaun ba kriminozu sira ne’ebé sees hosi Timor-Leste tanba ne’e Estadu presiza halo kooperasaun bilaterál liu-liu oinsá bele estabelese akordu estradisaun ho nasaun sira seluk, nune’e bele fasilita servisu judisiál nian ho di’ak liután.

Nia mós rekomenda ba PGR foun periodu 2021-2025 ne’ebé sei mai asume pasta PGR atu kontinua servisu sira ne’ebé PGR sesante husik hela hanesan memória institusionál no dinamiza planu estratéjika instituisaun ne’e rasik ho planu jerál liu-liu dezenvolvimentu instituisaun ba iha setór justisa nian oinsá hametin órgaun investigasaun kriminál.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here