Ministru Justisa, Manuel Cárceres da Costa. Imajen Tatoli/António Gonalves.

DILI, 30 marsu 2021 (TATOLI)—Komisaun A ne’ebé trata asuntu justisa no konstitusionál, hala’o audiénsia ho Governu liuhosi Ministru Justisa Manuel Cárceres da Costa, Defensória Públiku no Prokuradór Jerál Repúblika José da Costa Ximenes kona-ba alterasaun estatutu Ministériu Públiku (MP) nian.

Audiénsia públika ho Ministru Justisa Manuel da Costa Cárceres, Defensória Públiku no Prokuradór Jerál Repúblika José da Costa Ximenes, kona-ba projetu-lei númeru 23/V/3a-estatutu Ministériu Públiku.

Ministru Justisa Manuel Cárceres da Costa esplika, Governu ho Komisaun A halo ona konsensu kona-ba diskusaun estatutu Ministériu Públiku (MP) hodi avansa ba debate espesialidade.

“Governu husu alterasaun tanba estatutu ne’e kleur demais, tenke adapta ba realidade, alterasaun ikus liu halo iha 2011 (tinan 9 ona). Ita agora nesesidade ne’e oin seluk ona. Ita-nia evolusaun justisa nian oin seluk ona. Estatutu Ministériu Públiku tenke adapta tuir ita-nia kondisaun atuál. Intensaun polítika Governu nian mak ida-ne’e,” Manuel Cárceres da Costa informa ba jornalista sira, iha Parlamentu Nasionál, tersa ne’e.

Nia hatutan, parte Governu mós aprezenta proposta-lei kona-ba organizasaun judisiária no funsionamentu tribunal sira-nian, proposta-lei ida tán altera estatutu majistradu judisiál, no Ministériu Justisa mós sei haree dekretu atu halo alterasaun ba estatutu defensoria públiku.

“Ne’e hotu kuandu ita aprova tiha lei organizasaun no funsionamentu tribunál nian atu bele adapta estatutu sira-ne’e ho lei ida-ne’e. Proposta hosi Governu nian husu alterasaun hamutuk artigu 249 hodi fó liu autonomia ba iha Ministériu Públiku hodi garante efikásia no efisiénsia servisu Ministériu Públiku nian,” nia dehan.

Nune’e mós, nia dehan, Ministériu Justisa sei kria gabinete kontra korrupsaun no kria mós gabinete ba menór idade sira (labarik no labarik feto sira).

“Sira-ne’e hotu ne’e mak presiza halo alterasaun, hodi tama hotu iha alterasaun ida foun ne’e,” nia hateten.

Entretantu, Prezidente Komisaun A, Deputadu Joaquim dos Santos ‘Boraluli’, esplika Governu atu altera Lei númeru 14/2005, 16 setembru, kona-ba Estatutu Ministériu Públiku, alterada hosi Lei númeru 11/2011, 28 setembru.

Nune’e mós, atu altera Lei númeru 10/2009, 5 agostu, kona-ba Estatutu Remuneratóriu Majistradu Judisiál iha Majistradu Ministériu Públiku no Ajente Defensoria Públika, alterada hosi Lei númeru 16/2017, 4 outubru, iha parte aplikável majistradu Ministériu Públiku nian.

“Lei mai atu altera lei sira-ne’ebé ha’u temi ba ne’e entaun atu halo emenda kona-ba organizasaun Ministériu Públiku nian, atu harii ninia orgánika ho ninia autonomia atu bele garantia paralelizmu instituisionál,” Prezidente Komisaun A esplika ba Agência TATOLI.

Nia hatutan, aban bainrua mosu tán lei organizasaun atu harii tán grau tribunál karik hodi halo asimilasaun ho nível tribunál ninian, entaun Ministériu Públiku nian tenke altera hodi halo mós asimilasaun ho nível primeira instánsia, segundu instánsia ho Tribunál Rekursu.

“Matéria sira-ne’e mak tama iha estatutu ne’e, liga mós ba ogrigasaun ho devér ajente Ministériu Públiku nian hodi halo fali re-definisaun. Nune’e mós iha serteza jurídika bainhira ajente sira hala’o sira-nia kna’ar,” nia esplika.

Entretantu, kona-ba asuntu ne’e Komisaun A mós sei rona opiniaun hosi Prezidente Tribunál Rekursu Deolindo dos Santos, Asosiasaun Advogadu Timor-Leste no Programa Monitorizasaun Sistema Judisiál (JSMP-sigla inglés).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here