Plenaria Parlamentu Nasional. Imajen Tatoli Antonio Goncalves.

DILI, 29 marsu 2021 (TATOLI)—Reprezentante Povu iha uma fukun Parlamentu Nasionál (PN) kestiona rede internet ne’ebé fornese hosi kompañia telekomunikasaun Timor Telecom (TT) no Telemor ne’ebé kestionável tebes iha sosiedade.

Deputadu PD, Adriano do Nascimento. Foto TATOLI

“Ita-nia telekomunikasaun Timor Telecom no Telemor rungu-ranga, la’o hanesan lenuk, ne’e halakon povu no nasaun ida-ne’e nia osan. Ha’u husu Governu haree situasaun ne’e tanba sira simu osan, sira-nia internet ba-mai ladi’ak,” Membru Parlamentu Nasionál, Deputadu Adriano do Nascimento, levanta liuhosi plenária, segunda ne’e.

Deputadu hosi Bankada Partidu Demokrátiku (PD) ne’e husu Governu liuhosi Ministériu Transporte no Komunikasaun atu haree situasaun ida-ne’e.

“Sá teknolojia ida mak hanesan ne’e. Sá polítika ida mak hanesan ne’e,” Eis Ministru Prezidente Konsellu Ministru ne’e preokupa.

Iha fulan-jullu tinan 2002, konsórsiu Timor Telecom manán konkursu (BOT – Build, Operate, Transfer) ba kriasaun servisu hosi telekomunikasaun sira iha Timor-Leste.

Iha loron 17 outubru, konsórsiu Timor Telecom ofisialmente transforma ona iha Timor Telecom, SA–empreza direitu timoroan. Kresimentu Timor Telecom nu’udar operadora telekomunikasaun dahuluk iha Timor-Leste no iha 1 fulan-marsu 2003, Timor Telecom hahú halo operasaun iha Dili, Lospalos, Baucau no Oé-Cusse.

Pela primeira vez iha ninia istória mak, Timor-Leste iha rede telekomunikasaun, Timor Telecom (TT)  konsege kria ninia rede ba nasionál, nune’e mós indikativu ida hosi país +670.

Iha tinan 2011, Timor Telecom atinje kliente rihun 500 iha territóriu nasionál, ne’ebé tama iha servisu sentésimu site hosi servisu rede móvel.

Iha fulan-juñu 2017, Timor Telecom sai operadór dahuluk iha Timor-Leste atu lansa serbisu móvel internet LTE/4G ho velosidade lalais.

Entretantu, Telemor nu’udar naran komersiál hosi Viettel Timor-Leste, subsidiaria hosi Viettel Global-Grupu Telekomunikasaun prinsipál iha nasaun Vietname ida-ne’ebé investe ona iha nasaun 10 ho susesu liuhosi kontinente tolu (3) inklui Timor-Leste. Iha rede fibra ótika ne’ebé boot iha nasaun hotu, kobre to’o 96% iha teriritóriu nasionál Timor-Leste nian.

Telemor ofisialmente lansa iha fulan jullu 2013 ho objetivu universál servisu telekomunikasaun ba povu tomak no lori benefísu maioria ba povu, Telemor esforsu atu hadi’a kualidade rede, lori servisu foun, utilidade foun ba ita-nia kliente, no partisipa ativa iha atividade sosiál, atu kaer liman hamutuk ho povu Timor-Leste hodi harii moris di’ak, hanesan slogan kompañia postura katak “Telemor hetan diak liu” ka “Telemor fó moris di’ak”.

Telemor ho vizaun sempre pioneiru iha inovasaun no sempre rona ba kliente sira iha Timor-Leste. Misaun mak tenke kontinua atualiza no personaliza informasun teknolojia, telekomunikasaun no servisu konteúdu dijitál atu entrega valór di’ak ba povu Timor.

Ezisténsia Telemor ho estratéjia bisnis mak hanesan; (1) Lori informasun teknolojia no telekomunikasaun ba kada ema, kada família no atinje kada kantu iha vida sosiál; (2) Investe ba boot no kobertura rede ne’ebé di’ak; (3) Aplika teknolojia boot; (4) Diversifika ami-nia servisu ba kliente hotu; no (5) Folin atu adapta kada segmentu merkadu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here