Polísia feminina Munisípiu Dili, liu na’in-25 tuir treinamentu fíziku no mentalidade hodi atua kuakér sitasaun krime no anarkizmu sira iha Dili-laran. Imajen/Eugénio Pereira.

DILI, 27 marsu 2021 (TATOLI)—Prezidente Repúblika (PR), Francisco Guterres ‘Lú Olo’, hateten pandemia COVID-19 obriga polísia sira iha mundu tomak muda atuasaun iha terrenu liuhosi apoia umanitária sira iha sosiedade maibé laó nafatin hanesan instrumentu hasoru krime.

Xefe Estadu esplika, luta hasoru krime no aplika lei mak objetivu organizasionál hosi polísia sira iha mundu tomak.

“Dezafiu sira-ne’ebé mosu ohin loron ho pandemia ida-ne’e obriga polísia sira muda sira-nia atuasaun. Tanba ne’e, polísia sira iha mundu mós tenke foka liután ba sira-nia knaar nu’udar instituisaun ida-ne’ebé dedika-aan liuliu ba apoiu umanitáriu maibé la’o nafatin nu’udar instrumentu hasoru krime,” Prezidente Repúblika, Francisco Guterres ‘Lú Olo’, hato’o mensajen Estadu iha serimónia aniversáriu Polísia Nasionál Timor-Leste ba dala-21, liuhosi komunikadu imprensa ne’ebé Agência TATOLI asesu, sábadu ne’e.

PR Lú Olo hatutan, Governu aplika medida ona atu hamenus COVID-19 hada’et ba beibeik, mosu fali krime ho forma foun iha sosiedade, krime la kumpre lei no violénsia oioin, ne’ebé iha relasaun ho jéneru no akontese mós iha uma laran. Tanba ne’e duni, forsa no servisu seguransa, liuliu Polísia Nasionál Timor-Leste, tenke adapta ninia knaar ba situasaun foun ida-ne’e.

Xefe Estadu konsidera ajente polísia la’ós sidadaun baibain maibé sidadaun kualifikadu ida no tenke tau matan ba orden públika, tenke iha konxiénsia katak ninia knaar sosiál importante tebes.

“Hatene simu ho ulun malirin krítika saída de’it hosi sidadadun sira no sai ezemplu di’ak ba sosiedade nu’udar sidadaun ne’ebé kumpre mós lei no regra, no nune’e bele mós defende dignidade PNTL nian,” Xefe Estadu hateten.

Bainhira fiskaliza kumprimentu medida prevensaun hosi Governu, nia hateten, tenke haktuir prinsípiu Estadu Direitu nian iha kontestu emerjénsia nian liuhosi maneira ida-ne’ebé hanorin, informa no orienta povu, uza de’it forsa bainhira presiza duni, maibé tuir situasaun idak-idak ezije no natoon de’it hodi kontrola kedas.

“Haree ba knaar ne’ebé profisionál sira seguransa públika nian hala’o iha liña oin, importante tebes katak imi iha mós kondisaun servisu di’ak hodi hamenus risku infesaun. Ida-ne’e ezije halo mudansa ba imi-nia rútina servisu, tenke uza hodi biit ekipamentu protesaun pesoál, foti medida seguransa no prepara materiál ba orientasaun,” Xefe Estadu fó hanoin ba membru polísia sira.

Xefe Estadu hateten, iha tempu susar ida-ne’e, presiza Polísia Nasionál ida-ne’ebé iha motivasaun no preparadu, nakonu ho espíritu serví ho di’ak no banati tuir prátika sira-ne’ebé di’akliu hotu hosi polísia no seguransa.

“Ita presiza Polísia Nasionál ida-ne’ebé marka prezensa iha lurón, hatene hakbesik-aan ba Povu, hodi defende Povu nia liberdade no nia direitu atu moris fila-fali ho esperansa,” Xefe Estadu apela.

Ba ida-ne’e, kompete ba Estadu nu’udar riin ne’ebé garante defeza ba sidadaun sira-nia direitu no liberdade, atu rekuñese katak polísia presiza kondisaun maibé Polísia Nasionál presiza infraestrutura ne’ebé di’ak, meiu operasionál ne’ebé adekuada, hosi karreta to’o armamentu.

Nune’e mós, hosi ekipamentu hodi apoia atividade polísia nian to’o estrutura apoia teknolójiku tanba PNTL nu’udar forsa ida pertense mós ba Estadu.

“Hetan konfiansa no respeitu hosi Timoroan sira no ha’u, nu’udar Prezidente Repúblika, sente orgullu tanba haree duni esforsu no profisionalizmu ne’ebé Ita-boot sira hatudu liuhosi servisu importante sira,” Xefe Estadu akresenta.

Xefe Estadu mós saúda PNTL liuhosi Komandante-Jerál, Komisáriu Faustino da Costa no Segundu Komandante-Jerál Mateus Fernandes.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here