Diretora Ezekutiva Forum Komunikasaun Feto Timor Lorosa'e (FOKUPERS), Maria Fátima Perreira Guterres. Imajen/Espesiál

DILI, 26 marsu 2021 (TATOLI)—Diretora Ezekutiva Forum Komunikasaun Feto Timor-Leste (FOKUPERS), Maria Fátima Perreira Guterres, informa durante Governu implementa serka sanitária hahú hosi 08 marsu to’o ohin loron, FOKUPERS rejistu kazu violénsia domestika no violénsia hasoru feto no labarik minoridade hamutuk 47.

“Durante aplika serka sanitaria iha Dili, ami rejistu kazu violénsia hamutuk 47. Hosi númeru ne’e, vítima ne’ebé tama ba uma mahon iha tipu rua mak hanesan; violénsia doméstika mak boot liu hamutuk ema na’in-22 maibé iha oan balu ne’ebé tuir inan tama hotu ba uma mahon ne’e na’in-10, entaun sa’e ba na’in-32. Kazu violénsia abuzu seksuál ba labarik minoridade hamutuk 15,” Maria Fátima Perreira Guterres informa ba Agência TATOLI, liuhosi telefónika, sesta ne’e.  

Maria Fátima Pereira Guterrese hatutan, vítma sira-ne’ebé daudaun ne’e hela iha uma mahon ne’e, funsionáriu sira hela hamutuk ho sira iha hodi halo akompañamentu no fó asisténsia ba sira-nia kondisaun.

“Durante iha implementasaun serka sanitária nia-laran ne’e, ami hala’o nafatin servisu hanesan baibain. Tanba, hakarak ka lakohi, vítima eziste kada minutu ka loron ne’ebé mosu, ita la espera. Entaun, daudaun ne’e, sira-ne’ebé hela iha uma mahon, ami kontinua nafatin fó asisténsia ba sira,” nia dehan.

Nune’e mós, iha funsionáriu seluk ne’ebé durante ne’e sira fahe ba grupu hodi halo pikete semana ida, ema na’in-rua tanba iha kazu foun ruma karik sira sei atende hodi foti vítima sira-nia kronolójia hotu mak foin refere ba uma mahon. 

Fó aisténsia ba vítima sira, nia dehan, loloos ne’e Governu nia responsabilidade maibé tanba antes ne’e FOKUPERS hala’o nia servisu hala’o ona asisténsia ba vítima sira entaun Governu mós fó fiar ba FOKUPERS atu halo servisu ida-ne’e.

“Ita kompleta Governu nia servisu ne’ebé iha, ita suporta malu. Entaun ba iha momentu ida-ne’e, ita iha ekipa redi importante ida hanaran rede referrál iha Ministériu Solidaridade Sosiál no Inkluzsaun (MSSI) nia okos, entaun ida ne’ebé Xefia referrál ne’e mak MSSI ho organizasaun lubuk boot ida,” nia haktuir.

Vítima sira-ne’ebé daudaun ne’e rejistu iha FOKUPERS, nia hateten, balun mai rasik no balun kontaktu direta ba FOKUPERS mak funsionáriu sira ba foti vítima sira iha sira-nia hela fatin.

“Bazea ba mekanizmu iha rede referrál ninian, loloos ne’e ami hein simu vítima sira-ne’e hosi polísia. Tanba bainhira vítima sira kontaktu ba polísia, sira foti hotu vítima sira-nia informasaun, sira konsidera katak tuir vítima nia hakarak ba uma mahon mak foin pesoál PNTL Vulneravel Person Unit (PNTL-VPU) refere mai iha FOKUPERS, atu nune’e vítima bele hela iha uma mahon,” nia hateten.

Maibé, tuir nia, tanba problema ho transporte no situasaun serka sanitária entaun dala barak vítima sira mós liga diretamente ba FOKUPERS hodi husu apoiu, entaun FOKUPERS mak tenke ba simu sira iha sira-nia hela fatin.

Nia informa, ba kazu vítima sira-ne’ebé daudaun ne’e hela iha uma mahon ne’e seidauk bele prosesu ba Ministériu Públiku tanba agora iha hela situasaun serka sanitária, entaun FOKUPERS kontinua fó asiténsia ba nafatin.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here