Simeira globál edisaun datoluk via online ‘Timor-Leste Oil, Gas no Energy Summit’, iha Otél Novo Turismo, Lecidere, sesta (25/03). Imajen/Florêncio Miranda Ximenes

DILI, 25 marsu 2021 (TATOLI)-Ministériu Petróleu no Minerál (MPM) hamutuk Autoridade Nasionál Petróleu no minerál (ANPM) partisipa iha simeira globál edisaun datoluk via online hanaran ‘Timor-Leste Oil, Gas and Energy Summit’, hodi kontinua halo promosaun riku-soin petróleu no gás iha bloku 18, kompostu hosi 11 iha tasi-laran no hitu iha rai-maran.

Konferénsia virtuál ne’e realiza hosi empreza IN-VR Oil, Gas & Energy, ne’ebé nia sede iha Reinu-Unidu.

Ministru Petróleu no Minerál, Víctor da Conceição Soares, konsidera semeira globál hanesan eventu importante ba Estadu Timor-Leste atu halo promosaun no fó garantia ba empreza sira atu interese investe iha área petrolífera.

“Ita kontinua enkoraja nafatin liuhosi plataforma online atu fó konfiasa tomak  ba empreza sira mai investe iha petróleu no gás bloku 18 ne’ebé ita lansa ona konkursu públiku no kontinua halo promosaun dahuluk to’o edisaun datoluk ona,” Ministru Víctor hateten iha Otél Novo Turizmu, Lecidere, Dili, kinta ne’e.

Liuhosi promosaun hirak ne’e, iha ona empresa lubuk ne’ebé interesadu atu konkorre konkursu públiku ne’e iha faze pra-kualifikasaun no  balun submete kandidatura inklui halo ona kontaktu ho tékniku sira hodi sosa dokumentu tanba konkursu sei termina iha loron 01 outubru.

Notísia relevante: Provizóriamente, empreza 10 pra-kualifika konkorre konkursu públiku petróleu-gás bloku 18

Tuir Ministru, hafoin termina konkursu públiku iha outubru, rezultadu pra-kualifkasaun ba hirak ne’ebé intersadu sei konkorre iha Expo Dubai.

“Iha ne’ebá mak ita hatene empreza hira mak interse investe iha bloku ne’ebé  ita lansa ona, maibé agora empreza 10-resin mak interesadu ona, ne’ebé daudaun halo kontaktu ho tékniku ANPM atu organiza no negosia ho empreza sira,” nia akresenta.

Goverante ne’e dehan, semeira liuhosi plataforma online bele redús kustu no tempu iha ámbitu pandemia globál.

Biban hanesan, Prezidente ANPM, Florentino Soares Ferreira, reforsa semeira globál ne’e  hodi halo aprosimasaun no kontinua promosaun ba petróleu no gás bloku 18, tanba situasaun COVID-19 mak labele hasoru no koa’lia direta ho empereza sira.

“Ita hein iha outubru bainhira halo enserramentu promosaun, bele hetan empreza hitu ka ualu atu investe hodi halo esplorasaun no produsaun, nune’e bele fó esperansa foun ba ita-nia rai no povu,” nia tenik.

ANPM tau prioridade a’as tebes ba promosaun, tanba Bayu-udan kuandu dezmantela nia vida iha kampu, la fó ona reseita fundu petrolíferu, enkuantu kampu petrolíferu Greater Sunrise sei hein prosesu lubuk ne’ebé hatuur iha tratadu fronteira marítima.

“Ita presiza solusaun imediata liuhosi promosaun petróleu no gás bloku 18, atu empreza iha interese no mai investe, signifika ita bele fó kontinuidade ba produsaun setór petróleu no gás inklui fó esperansa foun ba Estadu TimorLeste,” nia katak.

ANPM sei ko’alia papél autoridade nasionál no minerál inklui servisu tomak atu hatudu kualidade no dezempeñu ne’ebé iha, liuliu administra no esplora kampu sira, aprezenta enkudramentu legál, rejime kontratuál no fiskál.

“Ita haree enkudramentu ne’ebé iha bele atrai no ekoraja empreza sira mai investe iha bloku 18 ne’e,” nia hatutan.

Konferénsia online ne’e, partisipa hosi empreza internasionál petróleu no gás inklui individu intersadu sira hamutuk 400-resin hosi kontinente hotu iha mundu.

Estadu Timor-Leste liuhosi Auotoridade reguladór hamosu ona kalendáriu iha loron 01 outubru 2021, oras 16:00 sei taka konkursu públiku ne’e, nune’e loron 04 outubru to’o 03 novembru 2021 tama ba faze avaliasaun.

Enkuantu, ANPM sei anunsia manan na’in ba konkursu públiku ne’e bainhira iha ona faze aseitasaun, nune’e iha loron 13 dezembru 2021 to’o 28 janeiru 2022 iha ona faze kontratu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here