Embaixadór EUA iha Timor-Leste, Charles Kevin Blackstone. Imajen TATOLI/Egas Cristóvão.

DILI, 25 marsu 2021 (TATOLI)—Embaixadór Estadu Unidu Amérika (EUA) iha Timor-Leste, Charles Kevin Blackstone, anunsia programa foun Ajénsia Dezenvolvimentu Internasionál Estadu Unidu (USAID, sigla inglés) ho montante millaun $93, ne’ebé sei estabelese iha Timor-Leste.

Diplomata amerikadu ne’e dehan, programa ne’e sei liuhosi akordu foun entre Governu ho USAID, ne’ebé sei implementa iha tinan lima oin mai no sei foka ba dezenvolvimentu ekonomia, juventude, empoderamentu feto no apoia populasaun vulnerável ka marjinalizadu sira.

“Ha’u enkontru ho Primeiru-Ministru no rona prioridade balun, kooperasaun nasaun rua di’ak tebes atu responde ba prioridade sira ne’e. Governu anunsia programa kooperasaun USAID nian ba tinan lima ne’ebé ho valór millaun $93. Programa ne’e sei halo kooperasaun ho ministériu sira hodi bele atinje prioridade sira ne’ebé estabelese ona hosi Governu Timor-Leste,” Embaixadór Charles Kevin relata hafoin hasoru malu ho Primeiru-Ministru, Taur Matan Ruak, iha Palásiu Governu, kinta ne’e.

Tuir nia, programa ne’e hanesan parte ida hosi programa lubuk ida ne’ebé EUA oferese ba Timor-Leste.

“Ami-nia programa sira ne’e oferese hosi embaixada, forsa paz, no militár EUA nian,” nia akresenta.

Aleinde ne’e, apoiu ne’ebé oferese ba país ida, ho valór prinsípiu ne’ebé hanesan komprimisu ba prosesu demokrátiku, protesaun no direitu umanu, no ba governasaun di’ak.

Enkuantu, apoiu importante lubuk ida ne’ebé EUA oferese ona ba Timor-Leste dezde tinan 2020 to’o 2021, iha área dezenvolvimentu saúde ho orsamentu hamutuk millaun $6.

“Iha tetu sira balun planeia hela atu konkretiza iha tinan hirak tuir-mai,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here