DILI, 24 marsu 2021 (TATOLI)-–Ministru Koordenadór Asuntu Ekonómiku (MKAE), Joaquim Amaral, informa, dadaun ne’e ministériu implementadór sira hahú koordena ho Sala situasaun, Sentru Integradu Jestaun Krize (CIGC, sigla Portugés) atu hahú filafali distibisaun Cesta Bázika iha munisípiu Dili, Baucau no Viqueque.
“Ita tenta halo koordena entre ministériu implementadór hamutuk ho empreza sira no Sala Situasaun atu retoma distribuisaun Cesta Bázika iha munisípiu tolu inklui Rejiaun Administrativa Espesiál Oé-cusse Ambeno (RAEOA), maibé sei kumpre distánsia sosiál tanba empreza sira prepara ona ai-han ne’ebé la fahe lalais bele dodok no a’at,” Ministru Joaquim hateten iha edifísiu Ministériu Finansa, Aitarak-laran, Dili.
Ministériu Koordenadór Asuntu Ekonómiku (MKAE) deside suspende provizóriu distribuisaun Cesta Bázika bainhira Konsellu Ministériu aprova Projetu Rezolusaun Governu ba impozisaun serka sanitária no konfinamentu obrigatóriu iha munisípiu Baucau no Viqueque hahú loron 16 to’o 29 marsu no munisípiu Dili hahú loron 16 marsu to’o loron 02 abríl.
Notísia relevante: Governu deside hapara provizóriu distribuisaun Cesta Bázika iha kapitál Dili
Ho nune’e, governante ne’e dehan, bainhira reativa distribuisaun, ministériu implementadór ho empreza inklui seguransa sira sei asegura atu garante distánsia ema ida ho ema seluk inklui medida sanitária ne’ebé estabelese ona.
“Ita haree iha munisípiu Dili, bele kontinua fahe voucher maibé koordena ho autoridade lokál atu limita ema halibur malu, enkuantu ba munisípiu sira empreza bele lori tuir ba komunidade ne’ebé seidauk asesu nia uma,” nia akresenta.
Retoma atividade ne’e ho intensaun, maski situasaun serka sanitária nia laran abitante sira bele hetan ai-han.
Ministériu implementadór ba programa Cesta Bázika hanesan Minsitériu Agrikultura no Peska (MAP), Sekretaria Estadu Kooperativa (SEKoop), Sekretariu Estadu Ambiente (SEA), Ministériu Turizmu, Komérsiu no Indústria (MTKI) no Sentru Lojístiku Nasionál (CLN, sigla Portugés).
Jornalista: Florêncio Miranda Ximenes
Editora: Julia Chatarina
