DILI, 24 marsu 2021 (TATOLI)—Tuir dadus hosi Klínika Bairru Pité (KBP), hahú hosi 1 janeiru to’o 23 marsu tinan ne’e, rejista pasiente Tuberculose (TBC) 118, hosi númeru ne’e na’in-lima mak lakon vida.

“Pasiente na’in-lima ne’ebé mate ho idade 52 ba leten, tanba sofre TBC ho komplikasaun,’’ Koordenadór Programa TBC iha KPB, José Maia Soares, hateten ba jornalista Agência Tatoli iha serbisu fatin, kuarta ne’e.

Notísia relevante:2030, OMS hakarak hakotu TBC iha Sudeste Aziátiku

Iha esplikasaun detalla, númeru 118 mai hosi fulan janeiru hamutuk 39, fevereiru 54 no marsu  hamutuk 25.

Hosi númeru ne’e, sira ne’ebé ho kategoria TBC pozitivu no tenke halo tratamentu intensivu hamutuk na’in 20-resin iha sentru izolamentu Tibar, sira seluk hela iha idaidak-nia uma mak kontinua halo kontrolu tuir regra tratamentu no rekomendasaun KBP.

“Bainhira Governu implementa serka sanitária iha Dili, pasiente TBC ne’ebé halo tratamentu iha ne’e enfrenta difikuldade transporte  tanba balun hela dook,” Koordenadór ne’e salienta.

Tuir José Maia Soares, moras TBC ne’ebé kauzadu hosi Mycobacterium tuberculosis, fásil atu kona ema hirak ne’ebé toman konsumu tabaku, má nutrisaun no estilu moris ladún saudável, inklui sira ne’ebé toman konsumu alkól.

Tanba ne’e, KBP iha ninia programa atendimentu prevensaun rutina no permanente katak, banhira identifika pasiente pozitivu-ruma, ekipa médiku tenki halo screening no sempre halo sensibilizasaun atu prevene mós transmisaun ba labarik entre tinan lima mai kraik, ne’ebé pertense ba família pasiente ne’e.

Parte KBP mós aproveita komemorasaun loron mundiál TBC ne’ebé sempre selebra iha 24 marsu, hakarak apela ba populasaun iha TL, atu kontinua pratika moris saudável hodi hadook aan hosi moras oioin, espesifíkamente TBC.

Kona-bá atendimentu iha KBP, koordenadór ne’e dehan, durante ne’e atendimentu la’o di’ak, tantu ba pasiente TBC inklui programa sira seluk.

Oras ne’e daudaun pesoál saúde ne’ebé fó asisténsia ba pasiente TBC iha KBP hamutuk na’in 12, kompostu hosi enfermeiru na’in-haat, doutór na’in-ida, tékniku laboratóriu na’in-rua, inklui apoiante programa hamutuk na’in-neen.

Durante ne’e KBP hetan apoiu hosi Ministériu Saúde (MS), Organizasaun Mundiál Saúde (OMS) no Gabinete Sosiedade Sivíl.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here