Vítima ne’ebé hetan taa iha tilun halo tratamentu iha ospitál. Imajen/Foti hosi Facebook

DILI, 24 marsu 2021 (TATOLI) – Joven na’in-rua sofre kanek iha sira-nia isin-lolon tanba hetan hana hosi ema deskoñesidu no na’in-ida seluk fali hetan taa iha nia tilun parte loos iha akontesimentu kazu krime balun iha Dili laran, tersa kalan (23/03).

Tuir relatóriu Polísia nian katak vítima sira ba kazu krime arma branka ne’e; na’in-ida hetan hana ho rama ambon iha parte liman nian iha area Manleuana, besik estasaun kombustivel Levi, purvolta tuku 07:00 kalan.

Joven na’in-rua seluk ne’ebé na’in-ida hetan hana ho rama ambon iha parte kabun no ida seluk hetan taa iha parte tilun nian, akontese iha área Comoro no konsege hamosu problema hodi halo juventude sira tuda-malu.

Komandu Polisia Munisipiu Dili rejista joven na’in-tolu sofre kanek tanba hetan hana hosi grupu deskoñesidu ho rama ambon iha área kapitál Dili.

Segundu Komandante PNTL Munisípiu Dili, Superintendente Euclides Belo, hateten hosi kazu krime ne’ebé rezulta vítima na’in-tolu ne’e, autoridade Polísia hala’o kedas intervensaun no detein ona juventude na’in-ualu (8) ne’ebé deskonfia envolve iha kazu tuda-malu no lori sasán kro’at duni-malu.

PNTL mós lori kedas vítima na’in-tolu ne’ebé kanek ba ospitál hodi hala’o operasaun hasai rama ambon iha sira-nia isin-lolon.

“Horikalan, mosu asidente iha Manleuana no Comoro nian rezulta joven na’in-tolu mak kanek. Ami seidauk bele fó sai sira-nia identidade, maibé PNTL Dili alarga kedas ninia operasaun preventiva hodi foti mós joven na’in-ualu maka halo hela identifikasaun,” Superintendente Euclides Belo, informa ba jornalista iha Komandu PNTL, Caicoli, Dili.

Komandu PNTL Dili no Servisu Informasaun Polísia (SIP) lansa ona iha terrenu hodi koopera ho autoridade lokál no membru Konsellu Polisiamentu Komunitáriu (KPK) hodi rekolla informasaun no buka tuir suspeitu deskoñesidu sira.

Komandu PNTL apela ba juventude sira atu tuur hakmatek hodi kontribui ba estabilidade.

“Ami husu ba povu atu kontribui, agora ba oin oras ne’ebé ita termina  tuku 22:00 Otl, ba leten, joven hotu-hotu tama uma labele iha tuur iha lurón, se maka la kumpre ne’e ami konsidera la kumpre ona regra serka sanitaria, no PNTL bele foti medida tuir lei,” Euclides Belo afirma.

PNTL Dili hetan apoiu seguransa hosi Unidade Espesiál Polísia (COE), Unidade Polísia Marítima (UPF), Unidade Patrullamentu Fronteira (UPF),  Batallaun Orden Públiku (COE) ho FALINTIL-Forsa Defeza Timor-Leste (F-FDTL) Unidade Polísia Militár (PM)  halo patrullamentu iha Dili laran

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here