Diretor Jeral SEPS, Superintendenti Asistente Polísia, Ismael da Costa Babo. Imajen Tatoli/Egas Cristovão

DILI, 23 marsu 2021 (TATOLI)-Diretór Jerál Sekretáriu Estadu Protesaun Sivíl (SEPS), Superindente Asistente Polísia, Ismael Babo, hateten informasaun sira ne’ebé hosi Diresaun Meteorolojia prodús importante tebes hodi halo prevensaun ba dezastre naturaís.

Iha kada loron 23 marsu , nasaun hotu iha mundu selebra loron mundiál meteorolojia nian. Selebrasaun loron ne’e haktuir ba formasaun Organizasaun Mundiál Meteorolójiku nian (OMM) iha loron no fulan idéntiku iha tinan 1950 liubá.

Organizasaun ne’e nu’udar órgaun espesializada iha área meteorolojia, idrolojia, operasionál no jeofízika, subordinadu ba Organizasaun Nasoins Unida (ONU).

Nasaun sira iha mundu, baibain komemora loron ida ne’e ho atividade oioin hanesan konferénsia, semináriu, feira inklui atividade kompetisaun oioin. To’o ohin loron, OMM iha nia membru definitivu hamutuk 193. Gabinete OMM lokaliza iha Jenebra, Suisa.

Ismael Babo, lori instituisaun SEPS nia naran kongratula loron mundiál meteorolojia nian ne’ebé mundu hotu komemora, inklui Timor-Leste.

Nia dehan, Servisu Meteorolojia importante tebes hodi prodús informasaun lubuk ona kona-ba alerta estimasaun tempu udan no anin bainhira iha indikasaun atu akontese dezastre naturaís hodi bele halo prevensaun.

“Ita apresia sira-nia servisu no kongratula sira liu-liu Diresaun Meteorolojia iha Timor-Leste oinsá dezempeña di’ak liután kna’ar importante iha futuru,’’ Superintendente Asistente Polísia, Ismael Babo hateten ba Agência Tatoli iha nia kna’ar fatin, Caicoli, Dili, tersa ne’e.

SEPS durante ne’e hala’o kooperasaun servisu di’ak ho Diresaun Meteorolojia iha Ministériu Transporte no Komunikasaun no mós hala’o servisu koordenasaun ho Tsunami alerta hosi India, Metrolojia Indonézia ho Austrália.

Jornalista   : Nelson de Sousa

Editór                 : Francisco Simões

 

HAKEREK NO HATÁN

Please enter your comment!
Please enter your name here