Timor-Leste Oil, Gas & Energy Summit Online. Imajen/Espesiál

DILI, 22 marsu 2021 (TATOLI)–Estadu Timor-Leste liuhosi Ministéru Petróleu no Minerál (MPM) hamutuk Autoridade Nasionál Petróleu no Minerál (ANPM) hatudu kompromisu kontinua halo promosaun riku-soin petróleu no gás liuhosi konferénsia online.

Tuir ajenda iha loron kinta (25/03) oras 16:00 lorokraik to’o 03:00 madrugada iha ótel Novo Turismo, sei realiza semeira globál edisaun datoluk via plataforma online ‘Timor-Leste Oil, Gas & Energy Summit’ ne’ebé organiza hosi empreza IN-VR Oil, Gas & Energy.

“Konférensia online ne’e to’o agora iha rejistu hamutuk empreza internasionál petróleu no gás inklui pesoál hamutuk 400-resin ona, maibé kada loron sei aumenta tan to’o loron ne’ebé determina ona. Ita rejista hosi rai barak,” Diretór Esplorasaun no Promosuan ANPM, Mateus da Costa, hateten ba Agência TATOLI, via telefónika, segunda ne’e.

Objetivu hosi simeira globál ne’e atu Timor-Leste bele aprezenta no halo promosaun ba konkursu públiku petróleu no gás hamutuk bloku 18 inklui foku ba promosaun riku-soin Timór iha área petróleu, gás no minerál.

“Ita kontinua halo promosaun konkursu públiku petróleu no gás iha bloku 18 ne’ebé tuir ajenda sei taka iha outubru tinan ne’e, maibé  ein jerál  promosaun ba indústria petróleu no gás iha rai laran orienta ba longu prazu tanba rai barak mak la hatene ita, ho nune’e nafatin halo promosaun hodi ema hatene ita,”Diretór ne’e akresenta.

Notísia relevante: Provizóriamente, empreza 10 pra-kualifika konkorre konkursu públiku petróleu-gás bloku 18

Nia konsidera, daudaun ne’e presiza esforsu maka’as liután atu halo promosaun liuhosi semeira sira atu ema hatene potensialidade jeolójia iha Timor Leste.

Promosaun ne’ebé ANPM hala’o ba nasaun hanesan Singapura, Londres, Abu Dabi, Estadu Unidu Amérika, Austrália no seluk tan, ne’ebé hatudu pasu pozitivu tanba empreza balun kuaze 10-resin hatudu ona interese no balun hatama ona dokumentu sira ba pre-kualifikasaun no balun mós hola ona dadus lubuk ida iha bloku 18 ne’e rasik.

“Ita sei aprezenta kona-ba potensialidade petróleu jeólojia, rejime fiskál, lejislasaun kona-ba petróleu no gás, no prosesu ka lala’ok konkursu públiku ba bloku 18 ne’e tanba partisipante  sira ne’e mai hosi nasaun barak hosi kontinente hotu,” nia hatutan.

Iha ámbitu semeira globál sei envolve oradór sira hanesan, Ministru Petróleu no Minerál, Víctor da Conceição Soares, Prezidente ANPM, Florentino Soares Ferreira, Prezidente no CEO Timor GAP,E.P, António José Loiola de Sousa, Diretór Ezekutivu Esplorasaun no Promosaun, Mateus da Costa, Diretór PSC no Legalista, Rosentino Amado Hei inklui Diretór Komérsiu ANPM, Agus Maradona Tilman.

Nune’e mós, Konsultan Prinsipál-ANPM, Paul Robinson, Vise-Prezidente SundaGas, Colin Murray, Seniór Jeo-sentístika no Manajementu Dezenvovlimentu Negósiu hosi empreza CGG, Jarrad Grahame, Espertu Indústria no Akademiku, Roberto Fainstein, CEO & Fouder GeoMar, Giota Giogli no Business Development Manager hosi empreza Zebra Data Sciences, Martin Bawden.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here