Ekipa Juventude Estudante Apoiu Umantáriu hamutuk ho Preziente CNJTL fó apoiu umanitáriu ba estudante sira-ne’ebé hela iha ‘kost’. Imajen TATOLI/Osória Marques.

DILI, 22 marsu 2021 (TATOLI)—Xefe Ekipa Posko Konsellu Nasionál Juventude Timor-Leste (CNJTL, sigla portugés), Romão Piedade Mendonça hateten, ohin, liuhosi Ekipa Juventude Estudante Apoiu Umantáriu CNJTL fó apoiu umanitária hodi fahe nesesidade bázika ba estudante na’in-135 ne’ebé oras ne’e hela iha “kost” (uma aluga) sira iha Kapitál Dili.

“Konsellu Nasionál Juventude simu dadus benefisiáriu ne’ebé kbiit laiha ne’e kuaze na’in-500 maibé tuir kbiit ne’ebé mak ita iha, ita fó apoiu ba ema na’in-135 ne’ebé mak konfirmadu hanesan ema kbiit laek. Entaun, ami oferese uluk ba sira na’in hira ne’e,” Romão Piedade Mendonça, hateten ba jornalista sira, iha salaun CNJTL, Faról, Dili, segunda ne’e.

Xefe ekipa ne’e haktuir, Ekipa Juventude Estudante Apoiu Umanitáriu fó apoiu ba estudante ne’ebé hela iha ‘kost’ ne’e bazea ba serka sanitária, Estadu dekreta Rezolusaun númeru 12/2021, 8 marsu, depois altera ba 15/2021, 15 marsu, halo situasaun ne’e afeta tebes ba maluk estudante sira-nia moris.

“Ho ida-ne’e, ami juventude foti inisiativa hodi rekolla dadus. Sasán nesesidade bázika ne’ebé ami fahe mak hanesan hanesan foos, mina, supermie no seluk tan. Sasán hirak ne’e ami hetan hosi deputada Lídia Martins, Alícia Sarmento, deputadu Patrocínio dos Reis, Arão Noé, no hosi parte AHMDTL, Maria do Ceo,” nia dehan.

Nia informa, ai-han ne’ebé ne’e atu tulun maluk sira-ne’ebé vulnerável tebes iha situasaun serka sanitaria, tanba kauza ida Ekipa Juventude Estudante CNJTL haree katak Estadu aplika serka sanitária limita ona ema-nia movimentu ba-mai.

Entretantu, Prezidente CNJTL, Maria Dadi Magno Soares, hateten situasaun agora afeta tebes ba komunidade nia-moris, tanba ne’e presiza apoiu no kontribuisaun hosi juventude sira ba povu ne’ebé laiha kbiit liuliu estudante sira-ne’ebé hela iha ‘kost’ sira iha Sidade Dili.

“Tanba ne’e, ohin, Konsellu Juventude Estudante Apoiu umanitáriu halo inisiativa tulun estudante sira-ne’ebé hela iha ‘kost’ iha Dili laran, ne’ebé presiza duni tulun hosi juventude ne’ebé iha kbiit natoon atu atende ba sira-nia moris loro-loron nian,” nia dehan. .

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here