Poeta Jerasaun 1990-nian, António Mota. Imajen/Espesiál.

DILI, 21 marsu 2021 (TATOLI)—Poezia nu’udar arte ida hodi dezenvolve ema-nia imajinasaun liuhosi linguajen umana ne’ebé retrata kualkér arte tanba ne’e Governu presiza fó importánsia ba loron mundiál hodi eleva foin sa’e sira-nia koñesimentu iha área literatura nian hodi promove dalen Tétun.

Poeta Jerasaun 1990-nian, António Mota, husu ba Governu atu konsidera no fó importánsia ba ‘Loron Mundiál Ba Poezia’, atu nune’e bele kontinua promove dalen Tétun no dalen Materna sira seluk iha Timor-Leste.

Notísia Relevante: Poezia instrumentu espresa sentimentu ho liberdade

Loron Mjundiál Ba Poezia nian ne’ebé iha tinan 1999 UNESCO deklara no deside loron 21 fulan-marsu ne’e, nia dehan, ho objetivu atu promove no dezenvolve literatura liuliu iha parte lee, hakerek, produsaun no sira seluk ne’ebé iha rejionál, nasionál no internasionál.

Poeta António Mota hateten, loron mundiál ba poezia la’ós loron bainbain de’it maibé loron ida-ne’ebé importante hodi nafatin tane-aas lian (materna) no mós tempu atu hamamar fuan ne’ebé to’os no kakutak ne’ebé manas ho polítika, satán iha tempu pandemia ida-ne’e.

“Ita mós presiza halo netik asaun ruma hodi promove no hanoin hikas ita-nia poeta sira-ne’ebé sai eroi ba Nasaun doben ida-ne’e. Hanesan foin sa’e ida, ha’u hakarak hato’o hela ba nai ulun sira (Governu) katak, karik literatura ne’e importante iha mundu liuliu iha Timor-Leste, entaun presiza mós ita-bo’ot sira-nia apoiu atu promove poezia, lian materna no mós dalen Tétun iha futuru, no hasa’e kreatividade joven sira-nian hodi kompete liuhosi lee no hakerek,” Poeta António Mota haktuir ba Agência TATOLI iha ámbitu komemorasaun Loron Mundiál Ba Poezia ne’ebé mundu tomak selebra iha kada 21 marsu, liuhosi WhatsApp, domingu ne’e.

Poeta Jerasaun 1990-nian ne’e esplika, ho obra poezia ne’e mak sai dadolin murak ne’ebé sai hosi fuan, hakoor ho lian, hamamar no hafurak ho imajinasaun.

“Poezia ne’ebè mai hosi fuan sei to’o mós ba fuan no hamamar fuan ne’ebé toos. Hanesan matenek na’in John F. Kenedy, dehan: Jika politik itu kotor, puisi akan membersihkannya, dan jika politik itu bengkok, sastra akan meluruskannyaSe polítika ne’e fo’er, poezia sei hamoos polítika ne’ebé fo’er, no literarura sei haloos polítika ne’ebé dezonesta,” nia haktuir.

Nia hateten, hanesan jerasaun ida-ne’ebé iha idealizmu kmanek, konserteza iha mehi duni atu dezenvolve obra literáriu, maibé atu dezenvolve ne’e presiza iha konsiénsia másimu no domin ne’ebé boot hodi realiza saida mak atu halo hodi dezenvolve obra literáriu ne’e rasik.

Atu atinje ida-ne’e, nia dehan, presiza aprende no lee barak atu nune’e bele minimiza ema ida-nia kustume (budaya) baruk teen lee, no tenke dezenvolve-aan liuhosi hakerek, hakerek, no nafatin hakerek, ho dalen Tétun, dalen materna no mós iha dalen sira seluk.

António Mota gosta promove dalen Tétun liuhosi poezia tanba dalen Tétun hanesan lingua ofisiál iha rai doben Timor-Leste. Nia hakarak konribui ba rai doben ida-ne’e liuhosi hakerek ho dalen Tétun tanba hadomi dalen Tétun ne’e hanesan hadomi Timor-Leste.

Iha tinan 2019 liubá, Poeta António Mota konsege tuir festival haketrek literáriu nian iha ASEAN ne’ebé organiza hosi ASTOPEDIA.ID kona ba “Poetry Writting Competition” hodi aprezenta ninia poezia balun.

“Poezia ne’ebé ha’u kompete iha tempu ne’ebá mak poezia ho títulu ‘Pelaut Cinta’. Poezia ne’e konsege tama iha “TOP 20 Best Asean Writting Competition 2019”. Komisaun organizadora hili poezia ne’e hanesan salah satu poezia terbaik tanba liuhusi prosesu selesaun ne’ebé naruk. Primeru selesaun hetan valór: 91.12, Segundu selesaun: 89, 76, selesaun terseiru ikus hetan valor: 88,97. Ho razaun ne’e, poezia ho titulu “Pelaut Cinta” hetan apresiasaun hosi poeta seniór sira hodi fó hela prezente (osan rahun) no sertifikadu hanesan rekordasaun,” nia haktuir.

Tuir nia, atu dezenvolve poezia iha era dijitalizasaun ne’e presiza iha konsiénsia no komitmentu hodi aproveita buka informasaun, utiliza tempu ida agora hodi aprende lee, hakerek atu nune’e lebele mout iha mundu nia konsola maibé ida tempu di’ak hodi promove no dezenvolve poezia sira iha ámbitu dijitalizasaun.

Esperiénsia ne’ebé Poeta António Mota hetan mak oinsá hadomi obra rasik, oinsá respeitu ema seluk nia obra no oinsá hasa’e ninia kreatividade, liuliu iha lee no hakerek poezia. Buat hirak ne’e mak sai hanesan bukae ida ba nia atu nafatin dezenvolve poezia iha furturu liuhosi hakerek, hakerek no hakerek.

Juventude ne’ebé gosta hakerek poezia ne’e hateten, loloos ne’e poeta sira iha ona planu ki’ik-oan ida atu komemora loron mundiál ba poezia ne’e, maibé tanba situasaun COVID-19 entaun kansela no halo tuir regra Estadu Emerjénsia ne’ebé Governu deside.

“Ha’u gosta hekerek poezia tanba ‘Ha’u hakerek, ha’u iha’, ‘Ha’u lee, ha’u hetan’, ‘Ha’u ku’u, ha’u hato’o’. Ha’u hadomi liu mundu poezia tanba poezia mak dadolin murak ne’ebé mai hosi fuan no ba fuan ne’ebé iha fuan,” nia dehan.

Ba komemorasaun Loron Mundiál Ba Poezia ne’e, nia hato’o mensajen ba foinsa’e sira iha territóriu Timor-Leste atu hadomi no poezia liuhosi aividade hakerek, ne’ebé nia hato’o liuhosi poezia simples ne’e;

Keta husik lapizeira been maran iha nia knu’uk

keta husik letra no liafuan sira mate iha iha rai lakan nia hakuak

No, keta husik imajinasaun lakon iha lójika

Mai, ita kadi lapizeira tutun iha fatuk Timor

Mai, ita daan lia no liafuan ho maho-ween Timor

Mai, ita hakór imajinasaun ho aifunan Timor

Mai, ita hakerek iha rai husar Timor

Ohin, ita hakerek

Aban, ita “Iha”

Maske ita isin sai rai rahun ona

Maibé ita iha ho lian no liafuan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here