Membru PNTL akompaña hela atividade tranzasaun negosiante sira iha pontu entrada Tasi-Tolu, sesta (19/3/2021) Imajen Tatoli/Antonio Gonçalves.

DILI, 19 marsu 2021 (TATOLI)— Sala Situasaun Sentru Integradu Jestaun Krize (SS-CIGC-sigla portugés), sesta (19/03), autoriza negosiante hosi Munisípiu Liquiça, Ermera, Bobonaro  no Dili, fa’an sasán ba malu iha pontu entrada Tasi-Tolu.

Pesoál PNTL balun ne’ebé destaka iha Postu Tasi-Tolu área João Paulo II nian, informa atividade ne’e hetan autorizasaun hosi SS-CIGC hodi garante estoke ai-han ka nesesidade báziku ba populasaun no vendedór sira hosi Liquiça, Ermera no Bobonaro.

Notísia Relevante : Modo-tahan ho ai-fuan dodok iha merkadu

Negosiante sira hosi Liquiça, Ermera no Dili bainhira transfere produtu lokal ba malu iha postu entrada Tasi-Tolu, Dili, sesta (19/3/2021) Imajen Tatoli/Antonio Gonçalves

Ba negosiante sira hosi Dili, bele ona sosa modo-tahan, ai-fuan no produtu lokál sira seluk hodi fornese fali ba merkadu sira iha Dili laran no negosiante sira hosi Liquiça, Ermera ho Bobonaro, bele sosa foos, mina, supermi no nesesidade báziku sira seluk tan hosi Dili liuhosi merkadu provizóriu iha pontu entrada Tasi-Tolu.

Mezmu estabelese merkadu provizóriu ne’e, maibé autoridade seguransa Polisia Nasionál Timor-Leste ne’ebé destaka fó seguransa iha fatin refere kontinua halo observasaun no aplika regra saúde públiku, hanesan tenke uza máskara, fase-liman beibeik ho sabaun no atividade merkadoria tenke  hahú tuku 06:00 dadeer to’o de’it tuku 4:00 loro-kraik, Oras Timor-Leste (Otl).

Iha fatin hanesan Na’in ba Loja Alexandro Munisípiu Bobonaro, Rostiani, hateten nia parte hetan autorizasaun hosi Prezidente Autoridade Munisípiu Bobonaro hodi sosa sasán nesesidade báziku iha Kapitál Dili atu bel ba fa’an fali iha Bobonaro.

“Ami kontente tanba ohin bele mai sosa sasán iha Dili, hanesan foos, mina, no seluk tan tanba iha Maliana estoke mamuk ona,” Rostiani hateten ba Agência  Tatoli  iha Tasi-Tolu, Dili.

Tuir observasaun Agência Tatoli nian iha terrenu hatudu katak negosiante sira hosi Munisípiu Ermera no Liquiça maioria lori produtu lokál, hanesan modo-tahan, ai-fuan no seluk tan.

Loza sira iha Dili bele lori sasán ba transfere ka troka malu iha estrada públiku área João Paulo II nian tanba bandu transporte husi Munisípiu tolu ne’e labele tama mai kapitál Dili, nune’e mós Dili labele ultrapasa ba Munisípiu Liquiça, Ermera ho Bobonaro.

Traballadór sira hatún foos hodi tula ba kamioneta sira iha merkadu pontu entrada Tasi-Tolu, Dili atu transporta ba Liquiça, Ermera no Bobonaro, sesta (19/3/2021). Imajen Tatoli/Antonio Gonçalves

Transporte públiku husi munisípiu tolu ne’ebé tula sasán hodi mai Dili forma hosi estrada públiku parte rai Otél Pelican Paradise nia-oin to’o iha Postu Polisia Tasi-Tolu. Nune’e transporte hosi Dili nian forma hosi eis kuartél Jerál F-FDTL Tasi-Tolu to’o iha fatin ka espasu merkadu ne’ebé polisia fasilita.

Karreta sira ne’ebé tula sasán bainhira atu deskarrega sasán ba karreta seluk tenke hatudu karta autorizasaun hosi SS-CIGC ba autoridade Polisia ne’ebé fó seguransa iha fatin refere.

Iha tasi-Tolu, iha ona tanki fase-liman ne’ebé instala iha fatin ne’ebá no kompleta ho sabaun fase-liman hodi fasilita negosiante sira fase liman beibeik.

Jornalista   : Agapito dos Santos

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here