Prezidente Repúblika, Francisco Guterres Lú Olo. Imajen Tatoli/António Goncalves

DILI, 19 marsu 2021 (TATOLI)–Prezidente Repúblika, Francisco Guterres ‘Lú Olo’, husu Governu atu implementa lalais programa  vasinasaun  ba  populasaun sira tanba ho medida sira ne’e mak bele prevene no kombate moras COVID-19 iha Timor-Leste.

Notísia Relevante: PR husu líder polítiku sira hato’o lia-loos kona-ba COVID-19 ba povu

“Ha’u husu Governu atu implementa lalais programa  vasinasaun  ba  populasaun sira. Ho laran haksolok mak ha’u simu informasaun katak Timor-Leste sei simu vasina  oferese  hosi parseiru dezenvolvimentu sira. Maibé, Governu Timor-Leste mós buka hela dalan atu sosa vasina ho ita-nia osan rasik, nune’e populasaun tomak Timor-Leste bele simu vasina hodi proteje-aan hasoru moras aat ne’e,” PR Francisco Guterres ‘Lú Olo’ hateten liuhosi mensajen Estadu kona-ba COVID-19 ba povu Timor-Leste, iha Palásiu Prezidensiál Nicolau Lobato, Bairru Pite, Dili, sesta ne’e.

Aleinde ida-ne’e, Xefe Estadu ne’e hateten, implementasaun serka sanitaria ne’ebé prolonga to’o loron 02 fulan-abril ne’e, susar duni ba ema-ne’ebé laiha rendimentu, tanba ne’e nia husu Governu atu aselera asaun umnatitária hodi fó apoiu nesesidade bázika ba populasaun sira.

“Atu hatán lalais ba povu nia-halerik, ha’u husu atu Governu kria mekanizmu lalais atu  populasaun liuliu ba sira-ne’ebé laiha rendimentu, atu  bele hetan asesu ba hahán loron-loron nian maibé respeita nafatin medida prevensaun COVID-19 nian,” PR Lú Olo hateten.

Entretantu, nai apela ba ema hotu-hotu liuliu ba líder polítiku sira, padre no madre sira, profesór, líder komunidade sira-nian, aman-inan sira no responsável  servisu iha setór públiku no setór privadu, atu sai ezemplu di’ak ba populasaun tomak kona-ba uza máskara beibeik taka ibun no inus tomak, fase liman ho sabaun beibeik no labele kaer matan, inus no ibun,  molok fase liman tenke hadook malu mínimu metru ida.

Xefe Estadu ne’e hateten, autoridade polisiál mós tenke hatudu tratamentu hanesan ba ema hotu, aplika regra ba ema hotu-hotu labele haree ba ema-nia estatutu polítiku, sosiál ka ekonómiku.

Tanba, nia dehan, lei ba ema hotu-hotu no labele mós hatudu tratamentu ba ema ho maneira ne’ebé Lei la hateten. Nia husu ba loja-nain sira atu labele aproveita tempu susar ne’e no hasae folin ba sasán sira ne’ebé povu presiza loro-loron.

“Estadu hatuur ona nia Lei no regra ba povu nia moris. Biar lei no regra la’o ho nia esepsaun, ita hotu-hotu tenke kumpre. Bainhira ema ka grupu viola regra, autoridade kompetente tenke barani foti medida  tuir lei no medida ne’ebé hatuur ona, atu ita ida-idak bele hasees-aan hosi moras aat ne’e,” nia hatutan.

Prezidente Repúblika husu atu Governu tau-matan di’ak liután ba pesoál sira hotu ne’ebé halo servisu iha liña-frente hodi  bele luta ho susesu hasoru moras aat ne’e.

Nunee mós, haree ba evolusaun moras COVID-19 iha Timor-Leste, importante tebes hatuur planu nasionál ida ho mekanizmu  koordenasaun nasionál di’akliu entre liña ministeriál no Entidade seluk Estadu nian.

Tuir nia, ministériu ida-idak iha planu rasik hodi oinsá hatán kedas ho nia ema no ekipamentu, haree oinsá envolve komunidade lokál hodi ajuda hatán ba transmisaun hosi vírus ida-ne’e, prepara ona sentru kuarentena no izolamentu iha munisípiu hotu-hotu, ho fasilidade loloos,  rekursu umanu natón no ekipamentu di’ak, atu corona vírus labele hada’et iha fatin sira-ne’e.

“Ha’u fiar katak Governu halo dauudaun esforsu atu hatán ba situasaun foun ida-ne’e. Tanba kazu pozitivu sa’e makaas iha rai-laran, ema balun hakaat subar fronteira-rai no ita-nia ema barak sai hosi Díli molok hahú serka sanitária. Tanba de’it maluk balu lakohi rona, ohin loron, ita iha ona kazu pozitivu iha Baucau no Viqueque,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here