Prezidente Parlamentu Nasionál, Aniceto Guterres. Imajen Tatoli /Egas Cristóvão.

DILI, 19 marsu 2021 (TATOLI)—Prezidente Parlamentu Nasionál, Aniceto Longuinhos Guterres Lopes, hateten deputadu sira-nia fiskalizasaun ba munisípiu iha serka sanitária no konfinamentu tenke bazea ba Estadu nia nesesidade.

“Ba fiskalizasaun ne’e iha limitasaun balu, ne’ebé ami labele kumpre totál hanesan peskizadór tanba ne’e fiskalizasaun depende ba Estadu nia nesesidade. Iha duni situasaun urjénsia atu deputadu sira halo dezlokasaun. Se laiha nesesidade ruma entaun sei bele adia, maibé tenke hetan atutorizasaun hosi autoridade kompetente,” Prezidente Parlamentu Nasionál, ko’alia iha uma fukun, sesta ne’e.

Nia haktuir, lei autorizasaun Estadu Emerjénsia garante atu parlamentu tenke kontinua funsiona nu’udar órgaun soberania maibé tanba situasaun pandemia ne’e no kondisaun interna parlamentu nian entaun iha limitasaun balu.

Nia esplika, fiskalizasaun deputadu sira bele liuhosi forma seluk, katak bainhira rona informasaun importante ruma hosi baze bele bolu autoridade kompetente ka membru Governu esklarese iha komisaun espesializada permanente sira.

“Estadu emerjénsia la limita deputadu sira-nia fiskalizasaun, serka sanitaria la’ós tanba kestaun legál maibé kestaun saúde públika nian, saúde mak deputadu ne’e rasik,” nia dehan.

Tanba deputadu sira mós tenke iha obrigasaun totál atu kumpre regra serka sanitária maibé iha situasaun emerjénsia ruma tanba deputadu sira iha podér tomak atu fiskaliza, maibé tenke liuhosi autorizasaun hosi autoridade sira-ne’ebé implementa medida serka sanitária ne’e.

Nia fó ezemplu, oras ne’e deputadu balun hela iha Maubara, Liquiçá no Ermera maibé iha iha ámbitu serka sanitaria ne’e tenke iha autorizasaun.

Iha parte seluk, Prezidente Parlamentu Nasionál ne’e fó-sai katak reuniaun plenária sei realiza kada semana dala-ida iha serka sanitaria ne’e.

“Durante serka sanitária, semana ida plenária dala-ida, komisaun espesializada sira funsiona nafatin. Maibé, kondisaun parlamentu nian liuliu atu garante espasu atu garante distansiamentu sosiál la permite. Tanba ne’e, iha limitasaun maibé tenke kumpre nafatin regra protokolu COVID-19 ninian,” nia dehan.

Maibé komisaun espesializada permanente sira kontinua diskutie insiativa lejislativa sira-ne’ebé oras ne’e iha komisaun idak-idak.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here