Diretor CIGC, Brigadeiru-Jenerál, João Miranda 'Aluk Descartes' . Imajen TATOLI/Egas Cristovão

DILI, 19 marsu 2021 (TATOLI)–Sala Situasaun, Sentru Integradu Jestaun Krize (CIGC, sigla portugés) fó autorizasaun ba sidadaun sira desloka bá munisípiu, maibé tenke aprezenta razaun no submete ba teste swab iha Laboratóriu Nasionál (LABNAS).

“Atu fó autorizasaun ema sai hosi munisípiu Dili bá munisípiu seluk, depende razaun ne’ebé sira aprezenta, se razaun loos duni ho kritériu ne’ebé iha rezolusaun Governu, Sala Situasaun bele autoriza maibé tenke aprezenta mós teste swab ho rezultadu negativu mak bele autoriza sai bá ninia munsípiu, kuandu pozitivu automatikamente tenke ba izolamentu,” Diretór Sala Situasaun CIGC, Brigadeiru-Jenerál João Miranda ‘Aluk Descartes’, hateten, hafoin hamutuk ho ekipa, ramata reuniaun ho Primeiru-Ministru, Taur Matan Ruak, iha Palásiu Governu, sesta ne’e.

Notísia relevante: Governu deside estende serka sanitária iha Dili to’o 02 abríl

Kritériu sira ne’ebé aplika maka kazu exesionál ne’ebé nesesáriu liu no tenke bá munisípiu.

“Ezemplu iha Dili Ministériu Edukasaun, Juventude no Desportu no Ministériu Ensinu Superiór dehan katak ho situasaun serka sanitária ida agora kansela ensinu hotu, maibé klaru katak estudante nia situasaun  tenke haree didi’ak atu fila munisípiu, hafoin situasaun ida ne’e ultrapasa mak filafali mai Dili, nune’e mós aprezenta rezultadu teste laboratoriál, ida-ne’e mak ami hanoin atu aplika,” Brigadeiru Jenerál ne’e dehan.

Entretantu, tuir rezolusaun Governu katak sé de’it mak atu desloka ba munisípiu seluk tenke hetan autorizasaun hosi CIGC.

Governu inpoin serka sanitária no konfinamentu obrigatóriu iha Dili hahú 16 marsu to’o 02 abríl no iha Baucau no Viqueque hahú 16 to’o 29 marsu.

Jornalista Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here