Peskizadór ba Asuntu Parlamentár hosi JSMP, Mateus Xavier. Imajen TATOLI/Evaristo Soares Martins.

DILI, 18 marsu 2021 (TATOLI)—Programa Monitorizasaun Sistema Judisiál (JSMP-sigla inglés) apresia ho produtividade reprezentante povu sira iha V lejislatura ne’ebé prodús ona lei no rezolusaun barak maibé husu Parlamentu Nasionál atu fiskaliza mós implementasaun ba autorizasaun lejizlativa hirak ne’e.

Iha meza prezidénsia Parlamentu Nasionál lideradu Deputadu Aniceto Longuinhos Guterres Lopes, konsege aprova ona autorizasaun lejizlativa kona-ba estadu emerjénsia hamutuk 11 no aprova rezolusaun hamutuk 15.

Lei ne’ebé V Lejizlatura prodús mak mak hanesan autoriza Governu prosede alterasaun hosi Kódigu Prosesu Sivíl, autoriza Governu lejisla kona-ba baze ba organizasaun Administrasaun Públika, autorizasaun ba realizasaun transferénsia estraordinária fundu petrolíferu, Medida Prevensaun no Kombate Korrupsaun (MPCC-sigla portugés), lei OJE 2020, Lei Protesaun Sivíl no lei OJE 2021.

Iha rezolusaun ne’ebé Parlamentu Nasionál prodús mak hanesan rekomenda ba Governu adosaun medida ba prevensaun infantisídiu no abandona bebé no labarik sira, ratifika akordu servisu aéreu entre Governu Repúblika Demokrátika Timor-Leste no Governu Austrália.

Uma fukun mós aprova rezolusaun ba deputadu balun presta deklarasaun nu’udar sasin iha Ministériu Públiku, aprova Konta Jerál Estadu (KJE) 2019 no aprova rezolusaun kona-ba Kombate alterasaun klimátika.

Purtantu projetu-lei kodigu mineiru oras ne’e deputadu sira hosi komisaun D ne’ebé trata asuntu Ekonomia no Dezenvolvimentu aprova ona artigu hamutuk 68 iha faze espesialidade.

Peskizadór ne’e nota iha diferensa entre lejislatura sira antes ne’e ho V Lejizlatura, tanba produtividade ladún maka’as.

“Lejislatura ida agora ne’e liuhosi kompozisaun meza prezidénsia foun ne’e ita haree katak iha mudansa signifikativu, liuliu fó importánsia ba lei Medida Prevensaun no Kombate Korrupsaun (MPCC). Lei ne’e sai preokupasaun públiku durante ne’e ema politiza lei ne’e iha kampaña maibé ikus mai hahú kedas lejizlatura dahuluk kedas mai to’o V lejizlatura ne’e mak foin aprova,” Peskizadór ba Asuntu Parlamentár hosi JSMP, Mateus Xavier, informa ba jornalista sira, iha Colmera, kinta ne’e.

Peskizadór ne’e mós apresia ho uma fukun ne’ebé aprova lei arbitrajen ba justisa maske seidauk públika iha Jornál Repúblika tanba inisiativa ne’e JSMP mós fó advokasia.

Nia dehan, oras ne’e inisiativa sira-ne’ebé prosesu diskusaun iha komisaun espesializada permanente sira mak hanesan proposta-lei defeza nasionál, projeitu-lei kódigu mineiru, proposta-lei enkuadramentu orsamentu jerál estadu no proposta-lei distema saúde.

Nune’e mós oras ne’e tama tán proposta-lei kona-ba estatutu Ministériu Públiku, estatutu majistradu judisiál, defensória públiku, proposta-lei organizasaun judisiáriu nune’e bele fó espasu atu loke tán tribunál sira, bele iha tán tribunál supremu.

“Ne’e nu’udar pasu pozitivu ida-ne’ebé mak parlamentu halo, asuntu lejislasaun sira-ne’e nesesáriu. Kuandu iha projetu-lei ne’e signifika parlamentu iha inisiativa, ami mós rekomenda ba Parlamentu Nasionál atu fixa mós lei sira-ne’e ninia durasaun, nune’e obriga komisaun espesializada permanente sira tenke deskute, lae hanesan uluk ne’e lei balun budu to’o kaduka tiha de’it,” nia dehan.

JSMP espera inisiativa lejislativa hirak ne’ebé oras ne’e iha komisaun no balun iha hela faze espesialidade bele finaliza iha lejislatura ida-ne’e.

“JSMP espera insiativa lejislativa sira-ne’e bele implementa ho di’ak, no parlamentu rasik mós tenke fiskaliza mós implementasaun lei sira-ne’e,” nia hateten.

Iha parte seluk, JMSP monitoriza Estadu iha Parlamentu Nasionál ladún di’ak atu reprezentante povu hala’o kna’ar ho didi’ak tanba ne’e nesesáriu duni iha edifísiu própriu foun.

Nune’e mós JSMP nota deputadu sira barak mak problema língua entaun difikulta sira-nia intervensaun iha plenária tanba maioria inisiativa lejislativa maioria ho lian portugés.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here