DILI, 18 marsu 2021 (TATOLI)–Prezidente Sentru Lojístika Nasionál (CLN, sigla portugés), Augusto Junior Trindade, hateten daudaun ne’e parte armazen nasionál prepara ona foos tonelada 12.000 hodi responde ba situasaun emerjénsia liga ho COVID-19.
“Ami sei aloka foos ba kada munisípiu tonelada 1.000, ne’ebé ba munisípiu hotu ami prepara ona foos tonelada 12.000,” Prezidente CLN informa ba Agência TATOLI via telefónika, kinta ne’e.
Enkuantu, ba Rejiaun Administrativa Espesiál Oé-cusse Ambeno (RAEOA), CLN prepara foos tonelada 3.000.
“Ba RAEOA sira husu tonelada 3.000, maibé sira foti ona saku 5.000 no hela restu sira sei mai foti hotu,” nia akresenta.
Prezidente CLN konsidera, presiza duni prepara foos tanba agora munisípiu Dili, Baucau no Viqueque iha períodu serka sanitária no konfinamenru obrigatóriu, tanba ne’e difikulta movimentu ema no sasán.
Daudaun ne’e, armazen nasionál iha stock foos hamutuk tonelada 23.000-resin, ne’ebé antes ne’e importa hosi vietname hamutuk tonelada 30.000.
Jornalista: Natalino Costa
Editora: Julia Chatarina
