Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira

DILI, 17 marsu 2021 (TATOLI)-Polísia Nasionál Timor-Leste (PNTL) Munisípiu Dili simu ona informasaun no halo identifikasaun  ba área balun ne’ebé abitante sira hosi Dili dezvia hodi ba munisípiu sira iha parte leste nian.

Segundu Komandante PNTL Munisípiu Dili, Superintendente Euclides Belo, informa  iha abitante balun ne’ebé tenta dezvia ho dalan ilegál sai hosi Dili ba munisípiu seluk  iha parte leste nian, liuhosi dalan ki’ik iha área Metinaro nian tama ba Laclo, Munisípiu Manatuto no liubá munisípiu sira iha parte leste nian, hanesan Baucau, Lautem no Viqueque.

Mezmu nune’e, Euclides Belo hateten komandu PNTL Lautem, Baucau Viqueque ho Dili kontinua  halo komunikasaun no koordenasaun hodi identifika abitante sira ne’e para lori sira submete ba ekipa saúde no halo teste swab COVID-19.

“Se iha teste maka sira pozitivu, automatikamente sei lori hotu ba izolamentu,” Euclides Belo hateten ba Agência Tatoli iha Komandu PNTL Munisípiu Dili, kuarta ne’e.

Membru PNTL ne’ebé destaka iha área Metinaro  la konsege deteta abitante ne’ebé hakat sai hosi Dili tanba iha área dalan Metinaro  atu ba Laclo nian ki’ik nune’e motór bele  tenta dezvia bele liu. Maibé ba oin polísia sei asegura liután hodi evita movimentu ilegál ne’e.

Euclides Belo, husu ba abitante hotu ne’ebé atu hala’o viajen ba munisípiu dalan di’ak liu mak husu pedidu autorizasaun iha Sala Situasaun Sentru Integradu Jestaun Krize (CIGC).

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here