Embaixada Timor-Leste iha Bruxela. Imajen/Espesiál

DILI, 17 marsu 2021 (TATOLI)–Diresaun Nasionál Finansa, Ministériu Negósiu Estranjeiru no Kooperasaun (MNEK) submete ona pedidu pagamentu ba Diresaun Jerál Tezouru, Ministériu Finansa (MF), ba renda no kustu operasionál hamutuk 27 hosi Embaixada no Konsuladu Timor-Leste iha rai-li’ur ho totál pagamentu $2.104.500.

Tuir nota ne’ebé Agência TATOLI asesu iha kuarta ne’e, pedidu pagamentu ba renda hamutuk 21 submete iha loron 16 marsu, enkuantu ba kustu operasionál hamutuk neen submete iha loron 17 marsu.

Pedidu pagamentu ba renda hamutuk 21 ba Embaixada no Konsuladu sira hanesan,  Brazíl, Konsuladu Atambua (Indonézia), Brunei Darussalam, Kamboja, Kuba (Havana), Mosambike (Maputu), Filipina (Manila), Koreia du Sul (Seoul), Xina (Beijing), Vatikanu, Estadu Unidu Amérika (Washington DC), Laos, Reinu Unido (Londres), Komunidade País ho lian Portugés (CPLP, sigla portugés), Bruxelas, Malázia, Birmánia, Konsuladu Sydney, Konsuladu Darwin, Novazelándia no Tokiu, Japaun, ho totál pagamentu $1.540.000.

Nune’e mós, pedidu pagamentu ba kustu operasionál hamutuk neen ba Embaixada no Konsuladu sira hanesan, Nova Iorke, Bruxelas, Vatikanu, Bangkok (Tailándia), Vietname no Jenebra, ho totál pagamentu $564.500.

“Daudaun Ministériu Finansa sei prosesa pedidu pagamentu hirak ne’e no sei rezolve iha semana ida ne’e nia laran. Ba Embaixada no Konsuladu seluk ne’ebé mak la mensiona iha lista ne’e, sei iha hela prosesu interna MNEK nian,” refere nota hosi MF.

Pagamentu ba reprezentante iha Sydney devolve dala-tolu

Ba Konsuladu Timor-Leste iha Sydney, iha novembru 2020, ministériu halo ona transferénsia ba kustu operasionál ho montante $20.039, maibé pagamentu ne’e kuaze devolve dala-tolu ona ho razaun enderesu banku benefisiáriu nia la loos.

MF mós informa ona ba MNEK atu koordena ho Konsuladu Sydney hodi fornese enderesu loos, nune’e bele fasilita transferénsia pagamentu ba verba rua ne’e.

“Liuhosi biban ida-ne’e, Ministériu Finansa hakarak husu ba Konsuladu Jerál Timor-Leste iha Sydney, atu informa enderesu atuál iha banku, atu nune’e banku bele atualiza informasaun ne’e iha sira-nia sistema. Tanba bainhira problema enderesu benefisiáriu seidauk rezolve, sei difikulta transferénsia tanba banku sei devolve filafali. Se karik ida ne’e akontese, la’ós kompeténsia Ministériu Finansa nian,” nota ne’e esplika.

MF klarifika, 75% prosesu ezekusaun orsamentu desentraliza ona ba liña ministériu sira desde tinan 2017.

“Prosesu ezekusaun orsamentu ne’e, 25% de’it mak envolve Ministériu Finansa nia parte. Tanba ne’e bainhira liña ministériu sira demora prosesu pagamentu hosi sira-nia parte, sei implika ba prosesu pagamentu tomak,” subliña.

Enkuantu, ba ajénsia autonómu no munisípiu sira, prosesu ezekusaun orsamentu desentraliza ona 100%, ne’ebé entidade rua ne’e mak sei realiza pagamentu hotu diretamente ba konta bánkaria benefisiáriu, exetu saláriu no vensimentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here