Portavós Governu no Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 17 marsu 2021 (TATOLI)—Portavós Governu no Ministru Prezidénsia Konsellu Ministru, Fidelis Manuel Leite Magalhães, hateten VIII Governu Konstitusionál komprometidu fó resposta lalais no efikás ba apoia umanitária, ekonómika no sosiál ba populasaun tanba efeitu COVID-19 iha Timor-Leste.

“Atu hatán ba situasaun epidemiolójika coronavírus (COVID-19) foun nia iha Timor-Leste, Primeiru-Ministru orienta ona membru Governu relevante atu impulsiona prosesu ne’ebé la’o hela, ba preparasaun resposta sosio-ekonómiku tanba efeitu COVID-19 nian, nune’e ho lalais determina no disponibiliza apoia umanitária, ekonómika no sosiál ne’ebé populasaun presiza,” Ministru Fidelis hateten liuhosi konferénsia imprensa iha salaun Prezidénsia Konsellu Ministru, kuarta ne’e.

Hanesan iha tinan kotuk, Xefe Governu define ona, nu’udar prioridade nasionál, katak presiza fó resposta ida lalais no efikáz, ba kustu no implikasaun sosiu-ekonómiku sira.

Nune’e, sidadaun ne’ebé afetadu efeitu negativu COVID-19 bele hetan protesaun iha situasaun ne’ebé lakon rendimentu no menus dezempregu, inklui empreza sira ne’ebé hasoru difikuldade, bele sustenta fluksu kaixa no atividade ekonómika kontinua la’o.

“Orientasaun hosi Primeiru-Ministru klaru, katak ita hakarak manan buat rua dala-ida, manan COVID-19 no hakarak halo esforsu hotu atu garante kondisaun sosiu-ekonómiku populasaun nia di’ak nafatin no la piór liu tanba surtu ne’e,” nia akresenta.

Apoia umanitária ba estudante no define apoiu ba liña frente

Ba kestaun ne’e, Governu sei fó apoia umanitária ba estudante sira ne’ebé afetadu no oras ne’e daudaun hela iha Dili no laiha konesaun ka fonte ne’ebé di’ak atu hetan rendimentu hosi familiár sira iha munisípiu.

Notísia relevante: Governu rekolla dadus molok apoia umanitária ba estudante iha kost

Aleinde ne’e, Ministru Fidelis infoma, iha tempu badak Governu mós define no finaliza apoiu ba traballadór liña frente ne’ebé kada loron kombate moras ne’e.

Tuir Portavós Governu, daudaun ne’e Governu iha faze ikus finaliza prosesu mekanizmu finanseiru ne’ebé nesesáriu hodi fó resposta ba impaktu COVID-19.

“Prioridade seluk Governu mak atu impulsiona prosesu akizisaun no implementasaun vasina hasoru SARS-CoV2, atu nune‘e populasaun bele hetan imunizasaun lalais liu,” nia akresenta.

Minsitériu Finansa (MF) halo esforsu boot ida, atu tempu badak hato’o proposta ba Konsellu Ministru kona-ba modalidade orsamentu  hodi halo deliberasaun.

Governu liuhosi liña ministeriál hahú prepepara proposta intervensaun no medida hodi submete ba Konsellu Ministru, ba apresiasaun no deliberasaun  hodi implementa medida sira ho lalais.

Liña ministeriál hahú preparasaun

Liña ministeriál sira ne’ebé daudaun halo hela preperasaun hanesan Ministériu Saúde (MS), Ministériu Defeza (MD) no Minisériu Interiór (MI), Ministériu  Koordenadór Asuntu Ekonómiku (MKAE), Ministériu Edukasaun, Juventude no Desportu (MEJD), Ministériu Ensinu Superiór, Siénsia no Kultura (MESSK) no Ministériu Obra Públika (MOP) ho akompañamentu besik hosi MF.

“Ita konsidera liña frente no tuir mai, ita mós haree nesesidade no preokupasaun ita-nia populasaun relasiona ho sosiu-ekonómiku tanba efeitu pandemia globál,” Ministru katak.

Governu hanoin presiza halo intervesaun liuhosi estabilizasaun ne’ebé aplika ona iha tinan kotuk tanba númeru propagasaun COVID-19 aumenta ba bebeik.

“Governu haree opsaun sira, maibé ami seidauk bele adianta detalla, tanba ne’e husu ba públiku atu akompaña nafatin no kumpre regra sanitáriu sira,” nia enkoraja.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here