Estudante eskola Ensino Basico Central (EBC) 1,2,3 Fleicha, Postu Administrativu Maubisse, Munisípiu Ainaro. Imajen Tatoli/Egas Cristóvão.

DILI, 16 marsu 2021 (TATOLI)— Organizasaun Naun Govermentál (ONG) Care International hamutuk ho parseiru-sira kontinua implementa programa Hahán ne’ebé atu fó Tulun ho Nutrisaun no Edukasaun – Ai-han atu Hadi’a Nutrisaun no Edukasaun (HATUTAN), iha munisípiu Ermera, Likisá, Ainaro no Manatutu.

Diretór Nasionál Asaun Sosiál Eskolár (DNASE), Joaquim Martins, hateten Care International kontinua implementa programa ne’e liuhosi fornesimentu fos, koto, mina atu estudante-sira bele hetan ai-han ho nutrisaun di’ak iha merenda eskolár.

Notísia relevante:  EUA Apoia Millaun $26 Haforsa Programa HATUTAN

“Estimasaun hosi fundu ne’ebé iha la’ós ba de’it labarik-sira iha eskola 440 iha Munisípiu haat ne’e, maibé sei apoiu mós komunidade ne’ebé hela besik área eskola ne’ebé presija duni,” Joaquim Martins hateten jornalista-sira iha MEJD, Vila Verde, tersa ne’e.

Nia esplika, implementasaun iha Munisípiu haat ne’e diferente ho Munisípiu-sira seluk, alende hetan fos, koto, mina no material-sira seluk, sira mós hetan apoiu orsamentu hosi Governu ba programa merenda eskolár.

“Munisípiu sira seluk la hetan ai-han sira seluk,  maibé hetan de’it mak osan ne’ebé kada estudante loron ida 0,25 centavu,” nia subliña.

Programa HATUTAN lansa ofisialmente iha loron 11 fulan-juñu 2019, ho objetivu atu hadi’a edukasaun, nutrisaun no saúde iha eskola hamutuk 440 no komunidade ne’ebé besik eskola sira-ne’e iha munisípiu Ermera, Likisá, Ainaro no Manatutu, liuhosi apoiu ba agrikultór-sira hodi hasa’e produsaun produtu lokál-sira, atu ho forma ida-ne’e bele hasa’e rendimentu agrikultór-sira nian no kria fonte sustentavel hosi ai-han sira ne’ebé iha nutrisaun, ba eskola lokál sira.

Programa ne’e mós sei tulun agrikultór-sira hodi sosa ekipamentu agríkola esensiál-sira no fornese asaun formasaun.

Programa ne’e nu’udar projetu ida ba tinan lima, ho valór osan besik millaun $ 26, ho finansiamentu hosi Departamentu Agrikultura Estadus Unidus Amérika-nian, liuhosi Programa Internasionál Alimentasaun no Edukasaun Infantíl McGovern-Dole, no implementa hosi Organizasaun Naun Govermentál (ONG) Care International, liuhosi parseira ho Ministériu Edukasaun, Juventude no Desportu, Ministériu Saúde, Ministériu Agrikultura no Peskas no ONG Mercy Corps ho Water Aid.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here