LIQUIÇA, 15 marsu 2021 (TATOLI) –Ministériu Turizmu Komérsiu no Indústria (MTKI) Munisipiu Liquiça, halo ona intervensaun hodi kontrola folin foos iha merkadu Liquiça.
“Los duni, semana kotuk ami tun direita ba terrenu hetan duni buat balu mak laloos iha merkadu sira,” diretór MTKI Munisípiu Liquiça, Salvadór Serão dos Santos, hateten hodi responde Agência Tatoli iha Liquiça, segunda (15/03).
Notísia Relevante : Folin foos iha Liquiça sa’e ba $16 to’o $19
Iha sábadu liubá, Salvadór Serão dos Santos ho nia ekipa halo intervensaun ba merkadu Maubara nian, ne’ebé identifika duni negosiante balun lori foos hosi Liquiça ba fa’an iha Maubara ho folin sa’e maka’as to’o $20,00 kada saku kilograma 30.
“Ha’u hasai kedan sira-nia foto hodi manda ba AIFAESA, nune’e situasaun normal bele halo prosesa,” nia hateten.
MTKI Liquiça hasai ona sirkulár ida lori ona ba Administradór Munisípiu asina ho baze dekretu lei númeru 29/2011 20 jullu ne’ebé kona-ba presu justu ho mós dekretu lei númeru 4/2011 1 juñu kona-ba krime falsifikasaun ka manipulasaun sasán folin.
Nia hateten, ba loja hirak ne’ebé halo manipulasaun ba folin foos, MTKI sei kondena ho lei refere hodi kastigu tinan-tolu (3) prizaun no aplika koima $3,000.00 ba leten.
Haree ba serka sanitaria iha kapitál Dili halo negosiante sira labele tama ba sosa sasán inklui foos, nune’e informasaun ne’ebé iha katak Governu prepara ona foos liuhosi CLN (Sentru Lejístika Nasionál) tonelada 1,000 atu halo intervensaun folin foos iha postu tolu, hanesan Bazartete, Liquiça Vila ho Maubara.
Jornalista : Hortencio Sanchez
Editór : Francisco Simões
