Xefe Suku Tirilolo, Postu Administrativu Iliomar, Munisípiu Lautém, Adão Ximenes. Imajen/Espesiál.

DILI, 12 marsu 2021 (TATOLI)–Xefe Suku Tirilolo, Postu Administrativu Iliomar, Munisípiu Lautém, Adão Ximenes, informa desde Timor-Leste hetan indepedénsia no restaura indepedénsia iha 2002 to’o agora, uma-kain 200 iha Suku Tirilolo seidauk asesu eletrisidade.

“Iha Suku Tirilolo ne’e iha uma-kain hamutuk 400 resin, entaun uma-kain balu asesu ona eletrisidade no uma-kain ne’ebé seidauk asesu ba eletrisidade ne’e hamutuk 200,” Xefe Suku Adão Ximenes ba Agência TATOLI liuhosi telefónika, sesta ne’e.

Nia dehan, komunidade ne’ebé seidauk asesu ba eletrididade ne’e kestaun la’os komunidade mak hela dook hosi vila maibé tanba distribuisaun liña eletrisidade mak seidauk to’o ba komunidade nia hela fatin.

Lidér komunitáriu ne’e informa, komunidade ne’ebé seidauk asesu eletrisidade ne’e kompostu Aldeia tolu iha suku refere mak hanesan Aldeia Tirilolo, Etevata no Aldeia Tatalarilarin.

“Ita-nia komunidade balu ne’ebé seidauk asesu ba eltrisidade ne’e la’os Aldeia ida nian de’it maibé hosi Aldeia tolu hanesan Tirilolo, Etevata no Tatalarilarin tanba komunidade hela kahur malu,” nia dehan.

Xefe suku ne’e hateten, preokupasaun ida-ne’e hato’o ona ba autoridade munisípiu no dala barak mós hato’o diretamente ba membru Governu balun ne’ebé vizita Suku Tirilolo maibé to’o agora nafatin laiha rezultadu.

“Prekupasaun sira-ne’e ita hato’o dala barak ona ba adminitradór munisípiu no dala ruma ami-nia suku ne’e hetan vizita hosi ita-nia nai ulun boot balun ne’ebé mai hosi nasionál, entaun ami aproveita hato’o diretamente maibé nafatin to’o agora seidauk iha rezultadu,” nia haktuir.

Nia afirma, komunidade ne’ebé seidauk asesu eletrisidade ne’e, balun ne’ebé iha osan mak sosa tenagah surya uza maibé sira-ne’ebé osan laiha kalan uza ahi-oan ne’ebé halo hosi kamí.

Tanba ne’e, nia husu ba Governu liuliu parte relevante atu toma atensaun mós ba preokupasaun sira hosi ninia komunidade iha área rurál.

“Ha’u husu ba Ministériu relevante haree mós ba ita-nia prekupasaun sira-ne’e tanba komunidade iha área rurál presiza mak infraestrutura báziku hanesan bee-moos, estrada no eletrisidade maibé to’o agora realidade ita-nia komunidade barak mak sei enfrenta ba problema hirak ne’e,” Xefe Suku Tirilolo Adão Ximenes hateten.

Suku Tirilolo, Postu Administrativu Iliomar, kompostu hosi Aldeia tolu mak hanesan Aldeia Tirilolo, Etevata no Tatalalain, ho totál populasaun hamutuk 2.464.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here