Saudozu Nino Konis Santana.

Hosi domin to’o esperansa ba Nasaun

Imi buka matenek atu serbí ita-nian rai, atu harii rai Timor Lorosa’e, ita-nian pátria.

Nino Konis Santana ho naran batizadu Antoninho Santana, figura sentrál ba Timoroan sira ne’ebé luta ba ukun rasik-án.

Moris iha rai-ulun (illa Timor), ho aldeia nia-naran Veru, suku Tutuala, postu administrativu Tutuala, munisípiu Lautein, iha loron 12 fulan-janeiru 1957 hosi inan Poco Tana no aman, Jee Makaru, Konis tenke husik família lubun hodi hamutuk ho maluk gerilleiru sira seluk, luta ba povu ida-ne’e nian libertasaun hosi invazaun, Indonézia.

Ho tinan hitu, Konis sarani iha kapela Tutuala, loron 3 fulan-marsu 1964 hosi amu salesianu. Hanesan ema Katóliku, saudozu nia jornada iha rezisténsia husik hela memória, ho letra;

Harohan ba Nai Maromak

Fó dame no domin

Sei husu ho laran tomak

Fó moris hakmatek……….maluk sira

 

Buat ida terus

Ema hotu ka anju Lalehan

Sira mos hatene

Tansá iha rai ne’e, Timor sala laek

Ohin loron mate barak, tan funu.

Hosi fraze ne’ebé nakonu ho sentimentu klean, Konis Santana, fataluku oan ne’e sempre hatudu ninia domin no respeitu ba nia maluk gerilleiru sira seluk.

Sentimentu forte ne’e, tanba husik família; inan, aman, alin mane ida ne’ebé mate iha inimigu nian kilat musan, halo nia domin forte liu ba ninia maluk sira iha tempu susar, ne’ebé nia hatudu liuhosi karta sira.

La’ós de’it liuhosi karta, maibé domin ho fraternidade ne’e nia hatudu mós ba nia-maluk gerilleiru; Antoninho Baptista Hammar (atuál Diretór Jerál Arkivu Muzeum Rezisténsia Timorense) ne’ebé hamutuk ho nia iha Ermera.

“Noko (alin) ita la’ós nain rua de’it, maibé ita maun alin nain tolu”, relembra Konis-nian alin, Izaldes Santana, bainhira hasoru saudozu iha Mertutu (abrigu), 1997.

Lia-fuan ne’e saudozu husik ba nia alin hodi konsidera mós Hammar hanesan parte ida hosi sira-nian família. Lia-menon ne’e la’ós hanesan ai-tahan maran ne’ebé anin hú leet de’it, maibé Hammar kontinua lembra, no simu responsabilidade hanesan alin hosi saudozu.

Hanesan alin, Hammar hatudu hodi simu mós todan no susar hanesan oan mane, bainhira inan Poko Tana husik mundu ne’e iha 2017.

Lasu maun-alin ne’ebé Konis hatudu ba nia-maluk gerilleiru sira, jestu hosi nia-aman ne’ebé nia halo tuir. Jee Makaru, hosi Tutuala halo fraternidade ho liurai Loré, José Cristovão, ne’ebé la’o to’o ohin loron.

Espresaun sira ne’ebé saudozu hatudu iha ninian karta sira; querido, longos abraços, irmão, saudades, calorosas saudações, abraço de muita fraternidade, no ho laran luak, nia mós hato’o diskulpa bainhira ho tempu naruk la hakerek karta ba-nian kompaneiru sira iha ai-laran no vila-laran.

Ho ninia simplisidade, saudozu espera mós liuhosi puizia domin;

Doben, ha’u husu ba ó

Rona netik ha’u-nian lia-fuan

Hodi Maromak naran

Ha’u hadomi ó.

Abrigu ne’ebé nakukun, hamaluk ho petromax, makina baku karta (mesin ketik), HT (handy talky), Konis, estudante eskola enjeñeiru Canto Resende iha Dili, hanoin oinsá Timor ne’e ninia futuru, ho mehi no esperansa povu iha illa kiik ne’e bele hetan liberdade.

Ko’alia kona-ba kultura no identidade, testu ida ne’ebé Konis hakerek iha loron 15 dezembru 1997, ba serimonia ida, nia hahú ho fraze; dignifika ami-nian povu. Laiha lia-fuan atu hateten, agradese. Laiha liman mak bele sukat hosi ita-boot sira-nian servisu ne’ebé importante! Realidade, povu ne’ebé laiha identidade no kultura, la’ós povu. Atinje nivel dezenvolvimentu ne’ebé avansadu, tenke eleva ita-nian nivel kultura.

Konis, kompleta nia kursu nu’udar profesór primáriu iha tinan 1974-1975, konsidera kultura no identidade ne’e importante tebes liuhosi edukasaun, hanesan prioridade dahuluk futuru governu, bainhira Timor ne’e independente.

Sekretáriu Komisaun Diretiva FRETILIN/Xefe Konsellu Ezekutivu ba luta/frente armada ho nia prespetiva; tetun nu’udar dalen ne’ebé importante tebes durante viajen funu ho diversidade oi-oin, ho ida-idak nian identidade no kultura.

Funu laran, ema Lospalos ko’alia lian-fataluku, Bobonaru ho bunak, makasae ema sira ne’ebé hela iha matebian nia okos, mambae, sira ne’ebé hela iha sentrál. Ema sira ne’e (gerilleiru) bele intende malu bainhira ko’alia lian-tetun.

Ho mehi saudozu nian liuhosi esperensia luta ne’ebé naruk ba povu nian liberdade. Estadu Repúblika Demokratika Timor-Leste liuhosi konstituisaun artigu 2 (soberania no konstitusionalidade) alinea 4 , Estadu rekoñese no valoriza norma no lisan rai-Timór nian ne’ebé la’ós kontra Lei-Inan no mós lejizlasaun seluk tan ne’ebé ko’alia kona-ba direitu ne’ebé mai husi lisan no toman.

Konis Santana konsidera importante prezerva identidade hanesan Timoroan, tanba hosi valór istória no kultura mak hatudu ita-nian karater hanesan Nasaun independente. Bainhira ita laiha identidade, ita sei sai atan ba kultura Javanez sira.

Tuir saudozu nian-hanoin, povu ne’e iha ninia dignidade kuandu iha nia identidade rasik. Tanba ne’e, antes nia mate, saudozu hakerek karta ida ba estudante universitáriu UNTIM (Universitas Timor-Timur); Imi buka matenek atu serbí ita-nian rai, atu harii rai Timor Lorosa’e, ita-nian pátria.

Ohin, 11 marsu 2021, tinan 23 (11 marsu 1998) Konis Santana husik nia família no Timoroan hotu. Nia isin lolon laiha ona, maibé nia husik hela memória lubun ne’ebé sei sura la hotu no la hatutan hotu iha Timoroan ida-idak nia moris hodi serbí rai ida-ne’e.

“Ha’u hanoin katak funu ka terus sei nafatin”, lia-fuan ne’e nu’udar sentimentu ne’ebé klean hosi saudozu. Fraze ne’e nia hakerek ho letra boot, bainhira halot ho dokumentu balun ne’ebé nia subar.

Loos duni, mesmu Timor hetan ona ninia independénsia, maibé batalla naruk ne’ebé Timoroan hotu kontinua luta ho ida-idak nian kontribuisaun iha liberdade ida ne’e mak oinsá hamutuk ho Estadu, toma atensaun ba prosesu dezenvolvimentu edukasaun, saúde, agrikultura no infraestrutura bázika sira seluk.

Ita-boot ho sira seluk nian luta mak ami-nian liberdade.

Hamutuk ho eroi sira seluk, deskansa hakmatek iha Imi-nian mundu.

(Hosi fonte oin-oin no livru José Mattoso; A dignidade Konis Santana e a resistênsia Timorense)

 

Editora TATOLI, I.P, Rita Almeida. Imajen Tatoli/António Gonçalves

Rita Almeida

Jornalista no editora ezekutiva, TATOLI, I.P

HAKEREK NO HATÁN

Please enter your comment!
Please enter your name here