Diretór Nasionál Estrada, Ponte no Kontrolu Cheia, MOP, João Mário Gama de Sousa. Imajen/Florêncio Miranda Ximenes

DILI, 11 marsu 2021 (TATOLI)--Govenru liuhosi Ministériu Obra Públika (MOP) fó ona indemnizasaun faze datoluk ba abitante afetadu konstrusaun projetu estrada hosi Tasi Tolu to’o Rotunda Comoro hamutuk 144, maibé falta afetadu ualu.

“Pagamentu ba afetadu sira halo ona ba faze datoluk. Pagamentu hahú fulan setembru no novembru 2020, ne’ebé maioria ita halo ona indemnizasaun, maibé falta na’in-ualu inklui mós Eskola São Miguel Arcanjo,” Diretór Nasionál Estrada, Ponte no Kontrolu Cheia, João Mário Gama de Sousa, informa ba Agência TATOLI, via telefónika, kinta ne’e.

Kustu indemnizasaun millaun $1,6-resin, hahú hosi pagamentu faze dahuluk iha setembru 2020, ba afetadu 46 ho valór $679.000, faze daruak iha 29 setembru 2020  ho totál afetadu 65 no totál indemnizasaun $846.000 no pagamentu ba faze datoluk iha novembru 2020 ba abitante afetadu hamutuk 23 ho orsamentu $131.000.

Diretór ne’e dehan, ba abitante ne’ebé hetan ona pagamentu balun hahú halo ona mobilizasaun atubele hamamuk área konstrusaun ho tempu fulan-tolu, hahú hosi osan tama konta bankária.

Governu seidauk halo pagamentu ba Eskola São Miguel Arcanjo tanba ho kustu millaun $1 ba leten.

“Kustu ne’e tenke lori ba Konsellu Administrasuan Fundu Infraesturutra (KAFI) atu aprova hafoin ba pagamentu, enkuantu efatadu na’in-hitu seluk la to’o millaun $1 ne’ebé bele deside iha nível ministériu hodi halo pagamentu,” nia akresenta.

João Mário rekoñese to’o ona prazu ne’ebé afetadu sira tenke hamamuk fatin konstrusaun, maibé Unidade Jestaun Projetu (PMU, sigla ingles) husu atu adia, molok Asian Development Bank (ADB) fó aseitasaun ba pedidu Governu halo empréstimu ba kustu projetu.

“Ita komprometidu atu hasai komunidade no bainhira balun lakohi, iha Institutu Jestaun Ekipamentu (IGE, sigla portugés) atu ajuda mobiliza, nune’e fasilita kompañia ne’ebé deside hosi Komisaun Nasionál Aprovizionamentu (CNA, sigal portugés),” nia hatutan.

Kustu indemnizasaun ba kada tipu sasán afetadu define ona, hanesan uma temporária ho kategoria hanesan didin ne’ebé uza kalen ka piku, ai-kabelak ka au, rai simentetadu, kakuluk uza tali metan no odamatan ho janela normál, sei selu metru kuadradu ho kustu $40.

Uma semi-permanente ho tipu didin meia-parede kombinasaun ho kalen, rai semetadu ka keramik, kakuluk uza talin kalen ka tali metan, odamatan no janela normál, selu ho kustu $80 ba kada metru kuadradu.

Uma permanente normál, ho karáter didin parede tomak, rai simentadu ka karamik, kakuluk uza kalen, odamatan no janela normál, didin la reboka no pinta ho kustu $110 ba kada metru kuadradu. Uma permanente luxu, ho karáter konstrusaun didin parede tomak (kompletu ho reboka no pinta), rai keramik, kakuluk uza kalen plástiku, foru kompletu (materiál kualidade), odamatan no janela (materiál kualidade), ho kustu $150 ba kada metru kuadradu.

Entretantu ba lutu temporária ho materiál uza kalen ka piku, ai-kabelak ho kustu $2 ba kada metru, lutu arame (cyclone wire) ho kustu kada metru $6, no lutu permanente normál ho fondasaun koluna normál, uza besi no batako, maibé la reboka kada metro $40 inklui lutu permanente luxu kada metru $120.

Ba Ahi-horis sei kontinua selu tuir padraun ne’ebé aprova husi Ministériu Agrikultra no Peska iha 18 jullu 2014 husi eis Ministru Mariano Assanami Sabino.

Ai-teka selu tuir idade hahú kada hún ida $5 to’o $30, Ai-mahoni kada hún $3 to’o $25, Ai-kameli hún ida $10 to’o $60, nu’u kada hun ho kustu $25 to’o $60, ai-kalju ho kustu $15, ai-kakao $15, Bua $25, malus presu unidade ida $5, kami $35, aidila hún ida $5, hudi hún ida $15, Sabraka hún ida $10, Kulu jaka hún ida $15 inklui ba presu modo jerál hahú husi sentavu 0,20 too $20.

Estrada Tasi-Tolu to’o Rotunda Comoro ne’e kuaze kilómetru rua hamutuk ho pakote estrada trosu Tibar to’o Tasi-Tolu ne’ebé kaer husi kompañia internasionál China Wuyi ho kustu millaun $12-resin, hahú iha loron 28 fevereiru 2017 to’o outubru 2019.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here