Ministru Justisa, Manuel Cárceres da Costa,simu prenda husi Diretór Estabelesimentu Prizaun Becora, João Domingos, bainhira selebra festa konsulta populár hamutuk ho dadur sira iha Prizaun Becora, kuarta (04/09/2019). Imajen/Mídia GMJ

DILI, 10 marsu 2021 (TATOLI)-Ministru Justisa (MJ), Manuel Cárceres da Costa, hatún ona  despaxu Ministerial númeru 19/2021, loron 9 marsu, hodi suspende atividade vizita família rekluzu ba estabelesimentu Prizionál Becora no Gleno.

Nota komunikadu ne’ebé, kuarta ne’e, Agência Tatoli asesu, despaxu refere hasai bazeia ba dekretu Governu nú.12/2021, loron 8  marsu nian ne’ebé liga aprovasaun ba Serka Sanitária no konfinamentu obrigatóriu iha Munisípiu Dili.

Antes ne’e mós Ministru Justisa, Manuel Cárceres da Costa, suspende ona atividade vizita família rekluzu ba iha Estabelesimentu Prizionál Suai. Ho razaun tanba implementasaun serka sanitáriu no konfinamentu obrigatóriu hosi medida sira Estadu Emerjénsia nian ne’ebé aplika ba Munisípiu Covalima.

Suspensaun ne’e fó esepsaun ba asisténsia legál sira no mós ba vizita sira ho karater umanitária nian iha prizaun tolu.

Suspensaun ba atividade vizita família rekluzu sei kontinua hikas hafoin Serka Sanitarian remata(bazeia ba despaixu sei remata iha loron 16 fulan marsu ka bele mós extende tuir evolusaun COVID-19.

MJ mós hasai  despaxu suspende mós atividade balun iha Diresaun Jerál Servisu Rejistu Notariadu (DG-SRN) nian, liu-liu hirak ne’ebé liga ho atendimentu públika nian hanesan, emisaun pasaporte, Billete Identidade, Sertidaun RDTL, Rejistu Kriminál no mós Rejistu Notariadu nian.

Maske suspende, maibé Diresaun Jerál Servisu Rejistu Notariadu sei kontinua atende servisu sira ho karater urjente nian.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here