Xefe Suku Caicoli, Hipólito Marques Sarmento. Imajén Tatoli/ Osória Marques.

DILI, 10 marsu 2021 (TATOLI)— Xefe suku Caicoli, Hipólito Marques Sarmento, hateten ninia-komunidade trauma, tanba parte Sala Situação Centro Integrado Gestão de Crises (SS- CIGC), foti sai pasiente COVID-19 hosi aldeia Devinu 12, iha tuku 22:00 (kalan).

Tanba ne’e, autoridade lokál ne’e rekomenda ba parte SS- CIGC katak, bainhira konfirma ona ema ruma ne’ebé pozitivu COVID-19, tenke foti sai hosi nia-hela fatin iha tempu loron.

Notísia Relevante:“Tuda pesoál saúde sei la hamate ami-nia espíritu”

“Se bele atu mai foti sai karik, tenke mai loron, labele mai fali iha kalan boot, oras ne’ebé ema hotu-hotu deskansa ona no la informa mós ba ami,” nia hateten ba jornalista-sira iha Caicoli, kuarta ne’e.

Hipólito Marques Sarmento mós rekoñese katak,  ekipa saúde ho Polísia Nasionál Timor Leste (PNTL) hetan tuda hosi ema deskoñesidu, no nia hakarak klarifika katak, ne’e la’ós tanba komunidade la simu, maibé tanba trauma.

“Ha’u nu’udár líder komunitária, horikalan haree ekipa saúde-sira mai barak no komunidade tauk. Situasaun ida ne’e tanba mai aserka ami kalan boot no mai derepente atu foti pasiente ne’e. Entaun, komunidade balun kala trauma, no tuda pesoál saúde, fatuk mós atu kona ha’u,’’ Xefe suku ne’e konta tuir.

Perante situasaun ne’e, nia dehan, hamutuk ho pesoál saúde-sira, membru PNTL konsola kedan pasiente no família atu kolabora ho SS- CIGC  tanba peste ne’e perigu.

Nia mós rekoñese katak, pasiente ne’ebé pesoál saúde-sira foti iha kalan ne’e, ema na’in-rua nu’udár feen ho la’en hosi suku Caicoli ne’ebé serbisu iha Sekretária Estadu Formasaun Profisionál no Empregu (SEFOPE).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here