DILI, 10 marsu 2021 (TATOLI)-Komandu Jerál Polísia Nasionál Timor-Leste (PNTL), Komisáriu Faustino da Costa, orienta ona Komandante Unidade Espesiál Polísia (UEP) hodi halo investigasaun kle’an ba oknum Polísia ida hosi Unidade Batallaun Orden Públika (BOP) ne’ebé baku ka basa pesoál saneamentu Munisípiu Dili.
Liuhosi video ne’ebé viral ona ida rede sosiál Facebook, kuarta ne’e, oknum membru BOP ne’ebé tara hela kilat haruka membru pesoál saneamentu na’in-rua basa-malu tanba de’it viola regra balun iha serka sanitaria.
Pesoál saneamentu ne’e ida basa nia kolega ladún forte, maka oknum BOP ne’e hakbesik mai hodi basa maka’as kedas iha pesoál saneamentu ida nia hanesan nu’udar lisaun para nia bele basa fali nia maluk pesoál saneamentu ida sira nain-rua la’o hamutuk ho karreta atu ba soe lixu iha Tibar.
Porta Voz Komandu Jerál PNTL, Superintendente Xefe Arnaldo de Araújo, haktuir insidente ne’e akontese iha tersa (09/03), purvolta tuku 3:00 lokraik, iha Tasi-Tolu, iha ne’ebé karreta kamioneta ra’ut fo’er momentu ne’e joven nain-rua nu’udar traballadór saneamentu tur iha kapaun leten nune’e membru seguransa ne’ebé hala’o seguransa iha area refere haruka sira atu tun hosi kapaun leten, maibé to’o dala tolu mak membru polísia ne’e haruka tun hosi kapaun leten mai rai hodi fó hanoin no ikus mai membru polísia ne’e haruka sira-rua basa malu.
Nia dehan, nune’e membru polísia ne’e haree sira-rua basa malu la maka’as hodi fó ezemplu no iha ema balun halo gravasaun video hatama ba iha Facebook viral tiha kedas.
“Asaun membru polísia refere la justu no Komandu Jerál PNTL orienta ona hodi loke investigasaun atu bele hatene motivu loloos hosi akontesimentu ne’e,” Arnaldo de Araujo hateten ba jornalista sira liuhosi konferénsia imprensa iha Komandu Jerál PNTL, Caicoli, Dili, kuarta ne’e.
Nia hateten, iha prosesu investigasaun mak bele hatene membru ne’e viola regra mak sei hetan sansaun disiplinár tuir lei ne’ebé instituisaun iha.
Komandu PNTL agradese ba komunidade ne’ebé sempre akompaña servisu membru PNTL nian iha terrenu no bainhira hasoru asaun ne’ebé la tuir lei hodi hato’o keixa.
Jornalista : Nelson de Sousa
Editór : Francisco Simões
