Kondisaun estrada ne'ebé reabilita hosi kompañia SAN José, nakfera iha área baliza entre Suku Tibar no Ulmera. Imajen TATOLI/Evaristo Soares Martins.

DILI, 10 marsu 2021 (TATOLI)—Estrada públiku diresaun Dili ba Liquiçá ne’ebé reabilita hosi kompañia SAN José S.A hosi España hahú nakfera iha área baliza entre Suku Tibar no Ulmera, Postu Administrativu Bazartete.

Ho kondisaun Estrada ne’ebé hahú nakfera, Xefe Juventude Munisípiu Líquiçá, Laurindo de Jesus, kestiona kondisaun estrada ne’e tanba iha momentu lansamentu kompañia promete estrada ne’e sei dura to’o tinan 20 maibé la to’o tarjetu estrada nakfera ona.

Nia dehan, ho kondisaun estrada ne’e provoka hamosu asidente no hatohar ona ema liu 10 no mate na’in-haat (4), tanba estrada kabeer maibé nakfera no lori ema barak sai vítima.

“Agora piór liu tanba estrada ne’e komesa nakfera no rahun. Estrada Dili-Liquiçá teste ba over load (kelebihan beban) ne’e bazea ba karreta sira-ne’ebé tula rai-henek, fatuk maibé ikus mai estrada ne’e komesa lulun-aan. To’o agora seidauk iha autoridade ida mak ko’alia kona-ba kondisaun estrada ne’e,” Laurendino de Jesus informa ba Agência TATOLI liuhosi telefónika, kuarta ne’e.

Nia hatautan, nia parte ko’alia ona ho autoridade Munisípiu Liquiçá maibé atu halo manutensaun ba kondisaun ne’e kompeténsia Governu Sentrál mak bele foti desizaun hodi ejize ba kompañia. Nia parte kestiona enjeñeiru ne’ebé halo dezeñu tanba la kontribui ba dezenvolvimentu iha área estrada nian.

“Di’ak liu Governu black list kompañia ne’e, se osan retensaun seidauk selu karik, lalika selu. Kompañia internasionál ne’e kompañia lokál sei halo di’akliu. kona-ba karreta fuzu boot sira-ne’ebé tula sasán ne’e bele fó impaktu maibé projetu konstrusaun portu Baía Tibar seidauk hahú, estrada ne’e aat ona. Agora piór liután, koserteza sei fó sala ba fuzu sira-ne’e maibé karreta sira hosi Atambua mai ita-nia rain mós tula sasán todan,” nia dehan.

Nia fó hanoin ba Governu liuhosi Ministériu Obra Públika, bainhira la tau atensaun ho urjénsia, kondisaun estrada ne’e sei kondisaun grave ba beibeik.

“Se Governu la tau atensaun sériu, aban bainrua Portu Baía Tibar di’ak ona entaun sasán todan mai tán halo kondisaun estrada sei grave liután,” nia dehan.

Xefe Juventude ne’e haktuir decker dalan ninin ne’ebé kompañia ateru la uza decker foun maibé mantein ho decker Indonézia nian, tanba ne’e mak fó impaktu ba kondisaun estrada ne’e.

“Sira uza decker foun mak iha parte Kaitehu nian maibé restu ne’e decker tuan,” nia akresenta.

Kondisaun estrada ne’ebé reabilita hosi kompañia SAN José, nakfera iha área baliza entre Suku Tibar no Ulmera. Imajen TATOLI/Evaristo Soares Martins.

Entretantu, iha loron 11 fulan-jullu 2013 liubá, Ministru Obra Públika, Gastão de Sousa, hamutuk ho Prezidente Komisaun E, asuntu Infraestrutura-Parlamentu Nasionál, Pedro da Costa (oras ne’e matebian), hala’o lansamentu primeira pedra iha Tibar, ho distánsia kilómetru 60 ho totál orsamentu millaun $50 inklui estrada Dili ba Gleno.

Estrada ne’ebé liga Dili to’o Liquiça, kilómetru 28.62 ho totál orsamentu millaun $20-resin, inklui manutensaun no hosi Tíbar ba Gleno, Munisípiu Ermera ho distánsia kilómetru 31.89 ho totál orsamentu millaun $29-resin, inklui manutensaun.

Iha diskursu, Ministru Obra Públika, Gastão de Sousa, informa, projetu ne’e sei ezekuta durante tinan 4 (fulan 47-Red) ho pavimentasaun uza alkatraun hot mix, sei dura to’o tinan 20.

Tuir Ministru Gastão, Governu Timor-Leste empresta fundu ba projetu ne’e hosi Banku Áziatiku ba Dezenvolvimentu (ADB-sigla inglés) no fundu Governu Timor-Leste liuhosi Orsamentu Jerál  Estadu.

Iha momentu ne’e, Ministru Obra Públika esplika, projetu sira-ne’e, kumpre regra no prosedimentu hotu, ne’ebé Governu Timor-Leste estabelese tiha ona, molok hakat ba faze implementasaun.

Dokumentu hotu kona-ba ninia implementasaun, hetan tiha revizaun hosi Instituisaun Governu nian, hanesan Sekretariadu Grande Projetu (SGP), Ajénsia Dezenvolvimentu Nasionál (ADN), Komisaun Nasionál Aprovazionamentu (CNA-sigla portugés) no ikus liu aprovasaun hosi Tribunál Konta.

Purtantu, Kompañia SAN Jose S.A hosi España mak ezekuta projetu reabilitasaun estrada Dili–Liquiça no kompañia PT. Pembangunan Perumahan Persero PDK, Indonézia mak reabilita estrada hosi Tibar to’o Gleno, Munisípiu Ermera.

Tuir Observasaun Agência TATOLI, iha terrenu nota katak kondisaun Estrada ne’ebé hahú nakfera parte Estrada klaran iha suku Ulmera nian. Nune’e mós diresaun Estrada Dili-Liquiçá rai monu hahú hosi Tibar to’o suku Mota Ulun, Postu Bazartete. Hosi rai monu ne’e halo fatuk no rai butuk iha Estrada ninin.

Ho kondisaun Estrada ne’ebé nakfera prezudika mós movimentu transporte públiku tanba halai ho velosidade aas bele hamosu asidente tráfegu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here