DILI, 10 marsu 2021 (TATOLI)-Komandu Polísia Nasionál Timor-Leste (PNTL ,Munisípiu Dili daudaun buka tuir hela ema deskoñesidu balun ne’ebé tuda ekipa saúde sira bainhira ba foti amostra teste swab COVID-19 ba abitante sira iha área Caicoli, Dili, tersa kalan.
Segundu Komandante PNTL Munisípiu Dili, Superintendente Euclides Belo, informa Diretora Saúde Munisípiu Dili komunika direita ona ba PNTL katak iha ajente profisionál saúde ne’ebé ba iha área Caicoli nian atu foti amostra ba abitante sira maibé hetan reasaun tuda hosi ema balun.
Ba jornalista sira iha Komandu Munisípiu Dili (KMD), kuarta ne’e, Eculides Belo hateten nia komandu PNTL orient ona polísia atu buka-tuir ema ne’ebé tuda ekipa saúde, maski nune’e, KMD seidauk simu investigasaun hosi akontesimentu ne’e rezulta vítima ruma kanek ka buat ruma hetan estragu.
Nia apela ba komunidade sira katak professional saúde hamutuk ho ekipa Sala Situasaun Sentru Integradu Jestaun Krize (SS-CIGC) nian ho parte seguransa hala’o servisu hodi garante ema nia direitu moris ba prevensaun COVID-19.
“Sira tama iha bairru ka área ne’ebé de’it mak atu halo teste swab ba sidadaun se de’it ne’ebé identifikadu husu atu koopera. Labele halo fila-fali asaun sira seluk no bainhira akontese polísia sei foti medida,” Euclides Belo afirma.
Jornalista : Nelson de Sousa
Editór : Francisco Simões
