Ekipa saúde halo teste laboratóriu. Imajen/Espesiál

DILI, 09 marsu 2021 (TATOLI)–Vise-Koordenadora Forsa-Tarefa ba Prevensaun no Metigasaun Surtu COVID-19, Odete da Silva Viegas, hateten kada loron Laboratóriu Nasionál (LABNAS) iha kapasidade analiza amorasta teste swab hamutuk 700.

“Kona-ba kapasidade ezame laboratóriu, kada loron bele halo analiza teste amostra sira hamutuk 500 to’o 700 sample. Hosi ezeme laboratóriu ne’e amostra hamutuk 250 mak bele hatene uluk ninia rezultadu,” Vise-Koordenadora relata liuhosi konferénsia imprensa iha Sentru Konvensaun Dili (CCD, sigla portugés), tersa ne’e.

Atuál Diretora Jerál Prestasaun Saúde-Ministériu Saúde (MS) dehan, kona-ba disponibilidade teste laboratóriu, daudaun  iha 10.000, no bele liu hosi totál ne’e tanba iha hela prosesu.

“Signifika kapasidade laboratóriu sufisiente. Ita-nia ekipa sira ne’ebé serbisu iha Laboratóriu Nasionál mós hala’o serbisu 24 oras, sira serbisu hosi dadeer to’o kalan troka malu, hodi halo teste ba amostra sira ne’e,” Odete hatutan.

Amostra hosi postu administrativu Tiliomar, munisípiu Covalima ne’ebé haruka ba LABNAS hamutuk 400.

“Signifika ita hein hela rezultadu lubuk ida, provável bele hetan mós pozitivu iha tempu besik ho númeru ne’ebé seidauk hatene,” nia akresenta.

 Jornalista: Antónia Gusmão  

Editora: Julia Chatarina

HAKEREK NO HATÁN

Please enter your comment!
Please enter your name here